老底子个被头，侪是用被面子搭仔被夹里一针一针钉起来个，勿像现在，差勿多家家人家侪用被套，葛是要便当多了。伊个辰光呒没洗衣机，汏被头是一桩邪气吃力个事体。

　　我辣辣学堂里读书个辰光，每趟汏被头对我来讲要算是大工程个。除脱汏个辰光被夹里重得来拖也拖勿动，呒没洗衣机当然也呒没脱水机，要拿被夹里绞干也是勿容易个。只好叫一个同学帮忙，嗒嗒滴个被夹里一人拿好仔一头，拉开来，两头绞，千万要捏牢了，假使脱手落到地浪向，就要重新汏过了。被夹里绞干仔再搭到操场上预先拉好个绳子浪晾晒。

　　被面子、被夹里晒干，钉被头又是桩麻烦事。到体育活动室寻好一只乒乓台子，揩清爽，先铺被夹里，摊上棉花胎，最上面是被面子，四边翻上去，要对准位置，抚平挺括，再一针一针个钉起来。我当时钉一床被头，差勿多要用两个钟头。

　　后来，我学到一个偷懒个办法。被头浪啥地方顶顶容易龌龊？当然是被横头。就是睏觉辰光靠近头颈个位置。姆妈搭我剪一块三四尺长，阔一尺左右个棉布（通常就用被夹里个料作来做），把被横头包起来，搿个物事也就被叫做“被横头”了。每隔一两个礼拜，我就拿被横头拆下来，汏清爽晒干再钉上去，原来一个月要汏一趟被头，现在差勿多两个半月才拆开来汏，省力勿少。

　　后来，有一家毛巾生产厂家看到了迪个商机，专门生产一种加长个毛巾，就叫做“被横头毛巾”，葛么拿伊钉辣垃被横头浪，毛茸茸个，就更加适宜了。所以，被横头毛巾一上市，就大受上海市民个欢迎，销路佬佬好个啦。