讲起早饭，一碗泡饭，再加一块萝卜干、半块腐乳或者昨日夜饭呒没吃光个剩菜，就可以吃一顿。味道还可以，肚皮能吃饱，早饭就算合格。至于营养够勿够，卡路里是勿是超标，阿拉讲勿清爽，所以基本浪侪是勿考虑嗰。

　　当然，以上侪是老早子个状态，现在大家生活侪改善了，开始讲究“早饭吃好，中饭吃饱，夜饭吃少”。前几年囡儿刚刚上班，就买了一台豆浆机回来，从此以后，阿拉就同吃了几十年个老朋友——“泡饭”拜拜了！

　　其实，阿拉屋里用豆浆机做嗰并勿是豆浆，因为通常豆浆侪是用黄豆做嗰，阿拉做个应该是五谷杂粮糊，内容要比豆浆丰富交关。买来黄豆、赤豆、莲心、薏米仁、花生米、高粱米咾啥，搿个几样末事各捞一把，淘清爽仔用清水泡几个钟头，再用豆浆机打成糊，盛出来，可以一次操作分几日天来吃，邪气便当。

　　每天早浪，舀几调羹前几天打好个杂粮糊到镬子里，加两小碗清水，再捞一把燕麦片，用调羹掏一掏，烧开，就是一锅喷香浓稠个杂粮糊。假使再考究一眼，还可以先舀好一勺从南货店里买来个胡桃、黑芝麻、冰糖粉到碗里，再用热腾腾个杂粮糊一冲，各种香味混辣一道，让人胃口大开。至于营养么，也是一眼勿推板嗰！

　　有一趟，无意间搭囡儿讲起，老早走过浙江路南京路口个利男居食品厂，总能闻道一阵阵个面包、蛋糕香味，我每次侪要停下脚步，做几趟深呼吸，感觉崭得勿得了，邪气适意！讲者无意、听者有心！只隔了一个礼拜，囡儿就拎仔一只面包机送到我搿搭。

　　据囡儿讲，搿台面包机既可以做面包还可以做蛋糕，有了伊自家屋里做面包和蛋糕一点也勿难。辣辣囡儿个指导下头，拿高筋面粉、发酵粉、鸡蛋、白糖、盐咾啥放进去，按照说明书一步一步操作，按部就班，阿拉搿种老头老太也侪会得用嗰。

　　喏，有仔面包机，早饭又有了新品种，味道邪气好，日脚越过越开心，侬讲对口伐？