一份香葱一份油，一把开洋加鲜头；要问味道好勿好，自家欢喜顶重要。

　　交关人欢喜葱油拌面，尤其是天热勿高兴烧小菜个辰光，葱油拌面可以当一顿饭，便当。比方讲前两天就马马虎虎拌过一趟，朋友圈里一发，留言还蛮多。

　　有好朋友看到迭碗面以后，发来一条消息：熬了两瓶葱油。一瓶用猪油熬，一瓶用菜油熬。比较下来，用猪油熬个比较香。

　　迭个朋友住辣芝加哥，勿远万里发条消息过来，伊肯定是想讲，要做好葱油拌面勿简单。

　　呵呵，葛末，阿拉就考究点。

　　先是下面。用鸡蛋圆细面，水开后面放下去，烧开，泼点冷水进去，再烧开就可以撩起来了，做拌面，面个质地要挺一眼。面撩起来后放冷（冰）开水过一过，沥干，放辣旁边；面爽气了，但呒没冷透。

　　再是熬油。可以先熬点油备辣海，随用随取。也有人喜欢现吃现熬，虽然讨点手脚，但是新鲜。老底子做拌面侪欢喜用猪油。有辰光想想，可能是老底仔菜籽油少，需要凭票供应？反正现在样样油侪有，随便侬欢喜。

　　所谓熬油，主要就是熬葱跟开洋；葱要多，一份油就要一份葱；葱汏清爽，葱白、葱管分开，沥干；开洋热水泡软，去泥沙。

　　油温勿好太高，否则葱会一记头焦脱。先放葱白、再放葱管、开洋，慢慢熬香后取出，油冷脱一歇后，放老抽上色，放生抽提味，南方人还欢喜放一眼眼糖提鲜，然后捺面放进去拌匀，盛进盘，再放葱和开洋提香。开吃！

　　做葱油拌面讲起来只是几句闲话个事体，其实也勿简单。勿相信，侬不妨试试看。