城隍庙老街浪向有一爿面北两开间门面个民间工艺纺织品商铺，三十几个平方。蓝印花布图样个招牌，老榆木制作个柜台，东半间摆放织布机、纺车等传统纺织机具。营业员侪是三林塘来个，一口浦东方言。走进店堂间，一股浓郁个乡土气息扑面而来。我欢喜到搿爿手工作坊式个店铺里走走看看，还因为伊有一个交关好个店名：丁娘子土布庄。

　　丁娘子是明代个一位农家妇女，心灵手巧，擅长弹棉织布。伊弹棉花个辰光花絮会得蓬蓬能飘起来，用搿种花絮来织布，又是轻软咾又是保暖。伊织个布名气老响个，叫“丁娘子布”。埃个辰光有人写诗称赞伊：“素风衣被遍他乡，春绢秋绢漫较量。织得吴锦云样薄，侬家妙手有丁娘。”我晓得丁娘子搿个名字，还是老早点垃拉浦东农村插队落户个辰光。我插队个地区主要经济作物是棉花，有纺纱织布个传统。一到农闲季节，家家户户侪会传出织布声。啥人织出一个新花样，河东塘西个阿嫂阿姊侪会跑拢来向伊讨教，还一口一声称伊丁娘子。啥人家新讨个媳妇会得裁缝会得绣花，宅村里老快就会传开来：某人家真有福气，讨着一个丁娘子。丁娘子成了巧妇个代名词。丁娘子织个布勿单单老百姓欢喜，还作为贡布送进宫廷，怪勿得上海郊区个妇女对伊推崇备至。

　　老街搿爿土布庄用“丁娘子”做店名，就是为纪念搿位织布前辈。丁娘子土布庄里有衣衫鞋帽、窗帘台布、扇子阳伞，还有拎包绢头咾啥，花式多，卖相好，侪是用蓝印花布做个。蓝印花布俗称“药斑布”，是阿拉国家民间传统印花织物，历史悠久，垃拉汉代个辰光就已经有搿种印花技术了。埃个辰光，我所在个生产大队有一个队办工厂，印染蓝印花布，讲讲是印染厂，只勿过是一个手工小作坊。我常庄去看伊拉印布。蓝印花布个整个印染过程侪是手工操作个。工人们先根据花样拿油纸头刻印镂空花纹，铺开摆垃本色棉布浪向，用刮浆板拿防染粉糊刮进花纹空隙漏印到布面。等棉布晾干以后，浸垃靛蓝液里染色。再拿浸染过个棉布晾干，刮脱防染粉糊，就显出蓝白花纹了。花样有蓝地白花和白地蓝花两种，按不同要求还好印成单面搭仔双面花纹。图案有花鸟、人物等，看上去色彩格调搭宋代个青花瓷差勿多，构图手法又老像商周个青铜器。看工人们操作一道一道工序，真叫是艺术享受。现在伊拉印染个蓝印花布仍旧侪采用纯天然原料，侪是用手工精心制作个，葛咾具有邪气高个实用搭仔欣赏价值。

　　每趟我走进丁娘子土布庄搿个淳朴无华个蓝白世界，总归会得辣陌生头感受到一种重归自然个脱俗搭仔清新。