对于阿拉年轻人来讲，是一道绕勿开个门槛，必须跨过伊再有可能进得个好大学，进个好大学再有好工作，推及下去，成为了新“克拉”以后，口袋里向就勿会得“瘪的生司”了，有了钞票再能够上台面、扎台型、掼派头，嗲妹妹也就自然而然个拨有腔调个花露水花进了。 

　　去年个高考填志愿到勿哪能难到我，左手一本《招生专业目录》，右手一本《近三年高等学校招生各专业录取人数及考分》，左右开弓，勿出半个钟头就拿一张草表填好了。我勿拿专业填满，勿想读个专业就是勿想读，填上去横看竖看看得勿适宜，勿如勿填个好。看看我同学个志愿表，阿拉班级个拿摩温一门心思考北大清华，邪气煞根；稍微蹩脚一点个盯牢复旦勿放，也勿管啥个 专业，进去再讲，倒是很有点“横竖横，拆家棚”个味【mi】道。有位女同学个志愿表填得密密麻麻勿透气，我问伊“侬把两本个志愿填介全，做啥？”，伊回我一句“有填勿填猪头三”，言下之意便是摆辣侬面前个一切个物事用勿着谦虚，侪可以利用。相较之下，有些成绩后进个同学辣海搿个辰光无天野地起来，华师大同济交大……花花绿绿、行情行市、一个比一个叫得响，好勿闹猛，我是蛮服帖伊拉“拼死吃河豚”个勇气个，当然伊拉还勿是人来疯，因为上海几年

　　前头实行平行志愿，风险小多了，搿辰光填志愿“心要热，头要冷”，开头可以冲一冲，但寻个保底个学堂还是老重要个。阿拉老师总讲“要掂清分量，勿要飞机浪吊大闸蟹——悬空八只脚，记牢：勿识相要吃辣货酱”，我倒认为勿要看平常里头伊拉勿大来三，天晓得垃圾股是勿是会变成潜力股、蓝筹股，毕竟高考卷子相当个活络，门槛精个人往往占优势。 

　　终于高考考好了，成绩下来了，一心想要去北大个人最终差了一分只能进南大；想进复旦个真真“天有好生之德”，比录取分数线只高了一分。“垃圾股”里向有瞎猫碰到死老虫撞进华师大大门个，也有霉头触到哈尔滨跌到两本的。我虽然勿跌落得溚溚渧，但万宝全书终于还是缺了好几只角，勿过现在上课听听钱乃荣老师讲讲上海闲话还是蛮有意思个。 

　　归根究底，想要进好个学堂还是要靠成绩、靠平常辰光个积累，混腔势淘浆糊望野眼个朋友想要靠任何填志愿宝典帮帮忙到头来只能越帮越忙。