去世界杯办签证，有世界杯球赛个门票就算硬档。法国世界杯我到了巴黎。签证有了，球票有了。搿还勿够齐全。熟门熟路个朋友事先关照我，要随手带好一把钞票，最好是美金，越多越好。进关辰光，办入境手续个法国人年纪一把，一面孔正经架势。伊看过我个护照，查过签证，验过球票，还问我一句：“在法国的一个多月里，有经济担保吗？”我马上摸出一叠美金，至少也有一万以上，伸过去让伊查看。老头笑了，摆摆手。伊盖了入境章：“祝你在巴黎过得愉快!”唉，一个月辣法兰西，住、行都安排好了，光吃吃白相相就有近十万法郎可以开销，一定愉快。Vear Happy!

　　德国世界杯我申请了40天个有效签证。去领馆领护照我看都呒没看一眼。德国人办事体认真细致，太信得过了。勿料，毛病就出辣此地。去德国坐了汉莎航空个大飞机，回程也办了搿家公司个机票。世界杯个闹猛一眨眼就飞过去了。同行个几个小记者窃窃私言，伊拉想来欧洲一趟勿容易，准备辣签证逾期后还多白相几天。拨我臭骂一顿，要做守法公民!准时回国!当我回来个辰光，出事体哉。我摊上大事了。

　　原来德领馆只批拨我14天个签证。我呒没一点发觉，我呆了40天。出关当口，两个德国边防警察收了我个护照，把我押进了一个空房间。语言勿通，只好请同机个同事太太来做翻译。德国警察配勿出中文翻译，同意了。三个勿同军阶个警官做审判官员。“临时法庭现在开庭!你已经违反了欧盟的出入境法律。事实清楚。你需要律师。一可以自行聘请。二可以由我们法庭指派。三可以自我辩护。”我当然选择自家辩护。德国人读了一长串法规，捉了交关问题。我自然认错。德文、英文、中文翻来翻去，搞落交关辰光。终于让我为自家辩护了：“一、我不识德文。呒没明白实际签证与要求签证个差异。主要责任辣我。二、德领馆官员呒没辣当时明示我，也有责任。三、德国汉莎航空辣晓得我只有14天签证个情况下为我办妥了40天之后个机票，有重大责任。我希望汉莎公司到庭，为伊拉个过错负责。”三个警官听罢面面相觑。我个辩护太出色了。以至于后来伊拉都笑了。法庭勿再严肃。最后以罚款完事。“您身上有多少钱？”我口袋里还有几千欧元呢。上海人个精明使我只摸出一张钞票，是一张50欧元个票子。“法庭决定，处罚40……找还您10欧元!”我改勿了好奇心：“为啥勿尽数罚没呢？太宽大了。”军阶最高那位警官又笑了：“留10元让您在机场里喝杯德国啤酒!”很愉快个虚惊。呒没影响我以后个信用。两年后我顺利个办出了去比利时个旅欧签证。谢谢欧洲人一家门!