外地朋友听勿懂个上海闲话里有一句：“老奎。”《上海话大词典》里个解释为：“老奎，自大，得意，摆老资格。”上海人一道茄山河，常常是有人出来摆老奎个。“讲到去法国白相，我老奎一记。巴黎铁塔、凯旋门、香榭丽舍大道、罗浮宫、圣母院、塞纳河。我熟透熟透。我去过三四趟了！”老奎用辣自家头上，可以算作褒义词。老奎也常常用辣贬低人家个。“侬奎点啥？法国当中个里昂、南面个马赛、西面个诺曼底，侬去过？讲拨侬听，我上个号头刚刚从伊面兜过一圈！”拨周围朋友讲成“奎劲十足”、“瞎奎八奎”、“奎头势勿得了”，葛末搿位先生或者女士一定是勿计场合个目空一切者。摆奎摆谱要看清人头。要好朋友、出窠兄弟面前可以奎一点，跑到长辈、上司面前就千万勿要摆出奎劲了。切记切记。老奎的奎字，我以为也可以写成“魁”。魁，《新华大字典》释义为“居第一位的；为首的。”我在此只是抛砖引玉，呒没一点冒充老奎个意思。见笑是也。

　　上海人称经验丰富者、老资格者为“老鬼”。“吃大闸蟹我老鬼了。蟹肉全部吃清爽，蟹壳还可以搭出一只蟹来！”“侬去搭老宁波搓麻将是寻棺材睏！伊学生意辰光就天天陪老板娘打牌了。牌龄超过侬年龄！”老鬼虽然有老奎个一点意思，但还是谦虚多了。勿敢称神，老神；不敢称仙，老仙；只敢称鬼，老鬼。要提醒上海闲话初入门者一句：老鬼个鬼勿能读成鬼子进村个“鬼”，而是要读成“居”。读对了，方显得侬对讲上海闲话也老鬼了。上海人还会讲出“老鬼三”。老鬼三是指人。搿个老鬼三，伊个老鬼三，内中是有贬义意思个。老鬼三还用来指勿方便讲明白个事物。“房间里有啥个老鬼三，自家去看！”“后弄堂里半夜里好像有老鬼三常常出来，吓煞人！”

　　上海个小囡、后辈假使老奎起来，上海闲话称为“老茄”。人小冒充人大，老茄。勿懂装作全懂，老茄。以弱示强，以强逞强，都是老茄。“小外孙口气大？老茄三千！”“小鬼头还要骂人？再老茄请侬吃头塔！”所以老茄有辰光会受表扬，老茄有辰光会吃进排头。老茄与老奎一样，勿是随随便便就可以拿出来卖弄一记个。老底仔上海滩上老奎、老茄、老鬼个脚色交交关关。讲句形容个闲话：上海个人民广场都立勿进、装勿下。现在新上海了，上海人谦虚了，上海人好学了。经常还碰得到一碰两碰就老奎、老茄起来个上海人吗？外地朋友，侬讲呢？