我屋里向对过一爿室内农贸集市前些时候拨“三角地菜场”收购脱了，成为伊个分场。重新装修开业伊天，小菜场挂出大红条幅：“百年三角地，一个新的家”。确实如此，从1890年公共租界工部局来垃文监师路、汉壁礼路、密勒路（今塘沽路、汉阳路、峨眉路）搿三条马路交界处搭建了一个蛮大个木结构室内菜场，到今朝三角地菜场已经走过一百多年辰光了。不过来垃三角地菜场前头，还有一家叫“中央菜市场”个更加早。

　　1860年太平军东进，苏南浙北大批难民涌进上海避难。1862年，租界人口激增到50万，形成华洋杂处局面。整个城市重心开始朝租界偏移，冒出一个又一个居民聚集区。搿些移民勿仅为租界个功能开发、上海社会经济个近代化提供了资金和劳动力市场，且形成一个巨大需求市场。当然民以食为天，“吃”是首先应该解决个问题，沿马路设摊个露天集市拨城市发展带来了交关弊端：交通拥挤、街衢污浊、管理无序等等。

　　1864年，法国神父博尔德里告英国商人汉壁礼共同向法租界公董局建议，由伊拉出资来垃自家地盘洋泾浜边浪向个宁兴街上（今宁海东路）造一个小菜场，每年上缴管理费，但要公董局拿原来分散来垃附近个马路集市侪集中到埃面去经营。公董局看到有利可图，就同意申请，成立“中央菜市场”，并规定特许权限为10年，期满后菜市场由公董局无偿收回；如果租赁者来垃期满之前停止经营，公董局有权提前收回。

　　于是公董局贴出布告，通知蔬菜、水果、鱼、野味等小摊贩，自1865年1月1日起，必须来垃中央菜市场出售自家个物事，勿得随便流动设摊。中央菜市场虽然靠公董局撑腰，却输得汤汤渧，因为小贩们散漫惯了嫌麻烦，勿习惯付月租，且基本浪是小本生意，所以侪勿肯去中央菜市场营业。真是天算地算勿如人算，刚开张就冷冷清清，逼得汉壁礼只好要求解除合约。公董局起先勿答应，但最后也明白伊自家也绝对拿勿出比汉壁礼更加好个措施，就连外国侨民侪抱怨取消了原来个马路集市老勿方便。因此，4月10日公董局无可奈何宣布关门打烊。

　　尽管中央菜市场只是来垃空地浪搭几个大棚；尽管中央菜市场早早夭折，却是按照西方近代城市个市政管理模式而开办个，并为廿几年后三角地菜场个开张以及红火打好了基础。