勿晓得从啥辰光开始，上海人拿钱财，叫成为“米”，印象中好像是从九十年代开始个，大概有市场经济头脑个人，比较敏感，粮食是生活必需品，而江南一带主食又是米，于是，“米”，成为了铜钿个代名词，或者叫暗语，说法还蛮有分寸个，一般个结算钱款，叫“结米”，勿太正规个油水较大个生意，叫“拉米”，还有将呒没本钱，坑蒙拐骗个生意，叫做“空麻袋背米”。改革开放让部分人钱袋鼓了起来，钞票多得“热昏”，一万块钞票，伊拉竟然会称为“一粒米”，或者“一只米”。一开始接触迭种叫法，还真有点勿习惯。

　　不过，闲话掉过来讲，上海解放初期，还真有过一段用“米”来结算工资个时期。当时新中国刚刚诞生，百废待兴，物价也勿太稳定，为了保障正常生活，人民政府采取了用“米”结算工资个政策，划定一个时间段，以每个工人工资可以买到个米个数量，折算成“单位”，比如可以买五百斤大米个，就算五个“单位”，往后，就以米价个波动，浮动工资，米价上去，工资上去，米价下来，工资下来，反正勿管米价哪能波动，能保证侬个工资能买到相对应数量个米。虽然实行个时间勿长，随了国民经济迅速走向正规，以“米”结算工资个政策也就退出了历史舞台。

　　现在个说法，是上海人个怀旧心理，还是由“米”引申出新意，吃勿大准，但听到“结米”个说法，想想过去走过个艰苦历程，应该是有所感悟个。