黄梅天一过，热天来了。上海个冷天可以冻煞东北人，上海个热天也能够热昏广东人。老底仔个上海人是用啥个法子来熬过大热天个？伊个辰光，大家呒没家用空调机，大多数个人家买勿起也用勿起电风扇。人手一把扇子是上海人抵挡热天个主要武器。男人用折扇。女人用檀香扇、香木扇。老人用蒲扇。蒲扇是以晒干个香蒲叶子做成个，大，轻。搧起来风大有劲。每一家人家少不了几把、甚至一叠大小蒲扇。有客人来走动，主人家奉上一杯凉茶之后还会呈上一把蒲扇，大家一道来人工降温。屋里向能够摆出一台会摇头转向个华生牌电风扇个就可以算大人家了。档子更高一档个人家辣客堂间、厢房里装了吊扇个，就可以称为当时个有铜钿人家了。蒲扇则是每家每户必备个夏令用品。蒲扇还可以用来赶苍蝇、拍蚊子。用旧用破了就下放到灶披间里去搧风生煤炉。现在个上海滩已经很难看到、买到蒲扇了。蒲扇，乃至几乎所有个纸扇、绢扇、竹扇几乎都被家用电器逼出了历史舞台。蒲扇，再会。牵记侬。

　　热天，上海人欢喜乘风凉。太阳落山、路灯初上，上海人就到弄堂里、马路口摆出各种各样个摊头来乘乘风凉。先用几铅桶自来水冲冲街面、降降温度，再搬出小板凳、藤靠椅、长凳、方桌占据地盘。一家老小尽数出动。几家邻居围辣一圈个就攀谈家常、茄茄山河。大人喝茶，小囡白相。老先生看看棋，小朋友打打牌。乘风凉是上海滩大热天里必勿可少个一道风景线。热天还是上海人谈恋爱、轧朋友个时令季节。热天里介绍朋友相会，双方可以穿戴简便，勿必行头毕挺。一身时髦打扮，开销太大。热天里男士可以显露好身胚，女士可以展示嗲身段。大家看得真切。热天里荡荡马路，吃点冷饮，孵孵冷气开放个电影院，也用勿了多少大投入。名扬天下个外滩恋爱角也是大热天里出产个镜头。热恋，就是上海人大热天里测谈出来个。侬相信？

　　老上海包打天下个冷饮第一可以算是赤豆棒冰、绿豆棒冰了。“棒冰吃？棒冰！”已成上海大小弄堂里个绝响了。如今家家人都有冰箱或者冰柜。棒冰已经被冰淇淋、紫雪糕驱逐。到超市里去买了一箱棒冰来塞进冰箱里个主角多半是40后、50后个阿爷、阿娘了。要尝尝小辰光个味道，辣大热天里那就是硬棚棚、甜咪咪个棒冰滋味了。还有个，是苦滋滋个大麦茶，是冰冰瀴个百合汤。还能回味出多少热天里个苦与甜，请来补充。