上世纪六十年代末，上海人家房子邪气紧张，因为我跟阿拉老伴当初屋里侪是住房困难户，所以准备结婚个辰光，我一有空就跑房管所，前门后门，软磨硬泡整整两年，好话勿晓得讲脱多少，总算分配到一间七平方米朝北个亭子间。迫于当时个政治形势，结婚个辰光，除脱结婚登记是公开个，其他事体侪要“火烛小心”，一勿当心就会引火烧身，连得发包喜糖也要四周瞄瞄，看看有勿有陌生人，同时还要小声关照一句“覅告诉别人喔”，就像战争年代情报员送“密电码”一样。喜酒就更加勿谈了，自家屋里忒小，只好借用房子大一眼个亲戚屋里偷偷摸摸办一桌。至于放炮仗，贴囍字，因为属于“四旧”，连想都勿敢想。迭能结婚，虽然冷冷清清，但印象要比现在富丽堂皇、亲友云集个豪华婚宴，要深交交关。亭子间屋顶浪就是晒台，热天像烘箱，冷天像冰箱，迭个也就算了，最难忘个是，儿子垃拉亭子间里慢慢长大，我每天大清老早送伊上幼儿园，垃拉幼儿园门口，人家个小囡侪会得对大人发发嗲，讲一句“早点来接我喔”，但是伊每趟侪是讲“侬晏点来接我喔”。听伊奶声奶气，挜求苦恼个腔调，我是每听一趟，心里侪要酸交关辰光。像伊迭能好动好奇又贪白相个小小年纪，放学以后回到“进门就上床，下床就出门”个亭子间里，呒没小朋友陪伊白相，只好爬到床浪，要么睏觉，要么就是翻翻已经厌脱个《红小兵》，伊是实在勿想介早回到屋里，所以伊总是幼儿园里最晏走个辣末头。

　　住垃亭子间里，最忙个是每天一顿夜饭。迭个辰光侪烧煤球炉，住垃前厢房还有一家邻居，因为呒没灶披间，两家人家个煤球炉，就只好放垃拉楼顶晒台门口个走道边浪。每天个早饭邪气简单，楼下点心店有大饼油条粢饭团，还有甜浆咸浆粢饭糕，跑一趟就完成任务，中饭一家人就各自垃垃单位解决，夜饭就只好自家动手。因为屋里地方实在太小，锅碗瓢勺，油盐酱醋等只好放垃屋里个台子浪向。从屋里门口到晒台走道要转三道弯，上下一趟有廿几级台阶，烧一顿夜饭上上下下勿晓得要跑几趟。菜勿多，但弄得比饭店里个跑堂还忙。烧夜饭最要命个是一碗滚烫个汤，从上头端到屋里，弯弯曲曲勿算数，外加扶梯边浪还堆仔两家人家杂七杂八个物事，要是勿当心绊一记，乃末事体就大了，轻则打翻汤掼碎碗，重则烫伤人上医院。

　　十四年后，阿拉一家人总算搬出亭子间。十年多前，我搭仔老伴贷款买仔现在住个一百多平方有电梯个房子，日脚过得越来越开心，但是阿拉两家头还是常常要讲起老早住过个亭子间。