年逾古稀，记性难免变差，交关曾经认为重要个事体已经忘记得差勿多了。勿过，对于小辰光个一眼事体倒是记得煞辣势清。

　　记得小辰光辣人民广场旁边个黄陂路浪有一座中苏友谊馆，经常举办各种展览。只要周末有空，阿爸就会带我去白相。里向个电影院票价特别便宜，只要五分洋钿，主要放映友好国家拍摄个纪录片、动画片，我顶顶欢喜看科普纪录片，对火箭发射和原子弹爆炸个场面感觉特别震撼。搿眼影片勿但让我开阔了眼界，增长了知识，而且对我产生了邪气深个影响，让我一点点产生了“长大以后要做科学家”个理想。

　　辣我读小学三年级个辰光，有一次上海举办小学生作文比赛，主要写“我长大了做什么”，题目自拟。埃歇辰光，大多数男小囡勿是想当解放军，就是想开飞机、开火车、开轮船，至于女小囡么，一般想做医生、老师、演员咾啥。侬一定猜得到，我自拟个作文题目就是《我长大了要当个科学家》。虽然三年级小学生词汇量有限，我搿篇作文倒也写了五百多个字，记得里向有一段写道：“我们中国也应当有人造卫星、运载火箭，我长大了要学会设计制造卫星和火箭，做个对国家、对人民有贡献的人”。

　　就是搿能一篇作文，评上了一等奖。颁奖大会浪向，我头一趟像模像样立辣主席台浪，领到一张血血红个奖状、一本赤括辣新个《中华大辞典》，还同颁奖领导合影留念。

　　让我惭愧个是，我最终当了一个普普通通个工程技术人员，呒没能够成为科学家。我个“最高成就”只是得过一次“上海市科技成果奖”，想想还是觉得蛮“坍招势”嗰！

　　有趣个是，我女儿小学三年级个辰光，自家报名参加《解放日报》个征文比赛，作文题目碰巧也是《我长大了要做一个科学家》，而且得了一等奖。后来，伊参加颁奖会个“获奖感言”还上过报纸。我从来呒没搭伊讲起过我小辰光个故事，勿晓得哪能会介巧，或许理想也会遗传？当然，世界浪毕竟呒没介许多科学家，女儿搭我一样，“当科学家”始终只是一个美好理想。伊现在辣一家外企当工程师。

　　再来讲讲阿拉屋里个第三代——还呒没进幼儿园个外孙女。伊平常特别欢喜看动画片，勿过，搿个小鬼头一勿要看《小猪佩奇》，二勿要看《萌鸡小队》，对“喜羊羊、懒羊羊、灰太狼”咾啥也勿感兴趣，倒是对一部带有科幻色彩个《超级飞侠》情有独钟。俗话讲：三岁看老。或许科学技术个种子已经开始种到小宝宝个心里向去了。迭个勿晓得阿会得就是所谓个基因遗传。