前几天辣新民晚报浪看到一则新闻，讲今年热天上海老百姓去游泳，勿需要再花6块洋钿办理纸质游泳卡了，只需要手机微信关注“上海体育”公众号，进入“游泳健身”小程序，填写个人信息并通过“人脸识别”实名认证，就可以辣微信卡包里领到一张“泳客健康承诺卡”。凭搿张“电子泳卡”就可以去买票游泳了。假使勿打算买保险，一分洋钿也用勿着花。看了搿条新闻，我一方面感叹现在科技发展带来个生活便利，一方面又想起小辰光为了能去游泳，办理游泳体检卡个事体。

　　记得辣辣上世纪五六十年代个辰光，阿拉要想到游泳池里去游泳，必须先弄到一张空白个“游泳体检合格证”，而迭张体检合格证要么去虹口、江湾、新城等大游泳馆买，要么就要到淮海中路、南京东路和长阳路浪向一爿叫“全国”个体育用品商店里买。对阿拉搿种住得比较偏个小朋友来讲，为了买张体检合格证要跑交关路。而且，辣买个辰光，假使碰着一位认真一点个营业员，伊还会问侬：“身体浪向有啥毛病口伐？要是有毛病就勿要买，否则买了也是白买。”

　　买到空白体检合格证以后，就要到街道医院里去挂号，请医生体检。从内科、外科一直到眼科、皮肤科，全部检查一遍，相当严格，假使讲侬有心脏病、血压高或者有沙眼、脚癣，医生肯定勿会拨侬通过，立刻帮侬打回票。只有等到所有科室里侪检查合格，每个负责检查个医生辣合格证浪签字盖章，侬才可以到门诊办公室，请总值班医生辣侬迭张合格证浪贴照片个地方，敲一只医院个骑缝章。到了迭一步，迭张体检合格证才可以派用场。

　　有了体检合格证，就可以去游泳池买门票了，但是等侬到淋浴间里汏好浴，穿好游泳衣，走到淋浴间通往游泳池个门口，还有人负责检查泳客身体是勿是已经汏清爽了。我有一趟去江湾游泳池，就是一位中年爷叔负责检查。侬覅看搿位爷叔相貌平平，一点也勿起眼，伊做起生活来邪气认真。埃息辰光，我搭子几个住辣一条弄堂里个小朋友，一道去江湾游泳池游泳。当时个江湾游泳池周围还有交关农田，看起来一派田园风光，马路边还能经常看到老早仔打仗辰光留下来个碉堡。对阿拉搿点住辣市区个小朋友来讲，邪气新鲜。阿拉几个小朋友就沿四平路一路走一路白相过去，等走到江湾游泳池门口，一个个侪变成大花脸，身浪向东一块西一块侪是泥印。

　　看到阿拉搿副卖相，旁边几个人边笑边指指点点。但是，勿管伊拉哪能笑法，阿拉几家头还是照样嘻嘻哈哈，进了淋浴间仍旧打打闹闹。大概是听到了淋浴间里闹闹哄哄个声音，立辣外头专门检查大家是勿是汏清爽个爷叔就伸头进来看。勿看勿要紧，一看，伊就朝阿拉几家头叫起来：“几个小鬼头，身浪介龌龊！勿郜我汏清爽当心请亻那吃毛栗子！”

　　拨伊搿能一叫，阿拉几家头有点吓丝丝，侪规规矩矩汏起浴来。但是等阿拉几家头穿好游泳裤，走到通往泳池个门口，还是被搿位爷叔拦下来，伊拿一根手指头朝阿拉头颈后头一搓，看到有老垢搓出来，马上就面孔一板，讲：“退回去郜我重汏！”就迭能介，汏了检查，检查了再汏，来回两三趟，搿位爷叔才放阿拉过门。

　　搿桩事体已经过去五十多年，回想起来还是蛮有劲嗰。一到大热天，游泳池就变得热门起来，交关人侪喜欢轧到游泳池里去避避热头、锻炼锻炼身体。现在虽然勿需要再经历复杂个体检过程，但是大家去游泳之前还是要对自家个身体状况有一个正确个评估，比如讲，有勿有皮肤病，肝炎、肺炎是勿是辣急性发作期，有勿有脚癣、沙眼、高血压，有勿有精神病史，女同胞是勿是辣经期等，里向只要有一项就覅去游泳，搿既是为了其他泳客个健康，也是为了自家个安全考虑。