前段辰光忽然来了兴头，就决定到杭州去白相。说走就走，邪气便当，高铁浪向打个瞌目充，勿到一个钟头就到杭州了。当然，车站浪老早就有老同学等辣海，曾经朝夕相伴四年个感情，又经过交关年数发酵，阿拉要好得像自家屋里人一样了。

　　西湖离得近，所以，交关上海人常常去嗰。年轻辰光一身力气用勿光，租只小木船，辣西湖里围绕仔三只石塔拼命划来划去，呒没道理个穷开心。

　　曾经一道划船嗰，有人已经天南海北勿联系了，也有人仍旧一道伴仔白相，只勿过，划船个劲道呒没了，坐好仔听船老大讲八卦个劲道还蛮足嗰。

　　据船老大讲，西湖之所以好，是因为西湖勿大勿小，水勿深勿浅，山勿高勿低。

　　不过，就算迭能，有趟仔伊碰着乘船个一对小青年，开始还好好嗰，一歇歇工夫就辣船浪穷吵八吵。劝也劝勿听，伊只好勿动声色，拿船划到岸边，生怕伊拉一记头想勿开。当然，假使伊拉两家头真个侪跳下去，伊肯定是先救美女嗰。船老大眼睛一眨就变成护花使者。

　　做了廿年船老大，问伊阿辛苦？当然，做一行怨一行咯，所以阿拉开心，伊笑嘻嘻来了句：人生三大苦，撑船打铁磨豆腐。勿过，伊看上去终究还是开心嗰，伊讲，晴西湖勿如雨西湖，雨西湖勿如雾西湖，雾西湖勿如夜西湖，夜西湖又勿如雪西湖。侬看，西湖船老大一歇歇又变成西湖旅游大使了。

　　乃末，听了船老大个“花言巧语”，阿拉几家头兴头上来了，索介约好，等2020年第一场雪来个辰光，一道去看雪西湖。