最近风吹到面孔浪特别适意，勿冷也勿热，春天总算是来了。到了搿个季节，春游就可以提上日程了，可惜现在交关小朋友从小就不缺旅游个机会，对伊拉来讲，学堂组织个春游最大个吸引力大概也就是用勿着做功课了。勿像阿拉小辰光，春游个日脚真个是仅次于春节个日脚。

　　记得埃歇辰光，寒假后一开学，交关小朋友就开始掰手指头算春游个日脚，至于去啥地方白相，阿拉到也勿大关心，因为勿管到啥地方去，对阿拉来讲侪是蛮新鲜嗰。哪怕就是手拉手排好队，到大光明电影院去看场电影也觉得老扎劲嗰。

　　黄陂路转到南京路打弯个地方，原来是一爿西饼店，走过店门口，就看到橱窗里琳琅满目个小蛋糕和掼奶油，售卖窗口飘出来个是咖啡香和烘焙蛋糕个浓香。虽然袋袋里呒没钞票，只好看看新鲜闻闻味道，但是心里也会老满足嗰。现在个小朋友肯定会勿理解，但是阿拉小辰光就是搿能样子嗰，从不同个途径阿拉侪可以寻到丰富个体验，物资相对匮乏让阿拉更容易满足。

　　春游前一天夜里，交关小朋友侪会兴奋得困勿着觉，或者因为担心第二天落雨而困勿着。埃歇辰光大家屋里向侪呒没电话，春游当天碰到，第一句闲话讲得最多嗰侪是“我昨天夜里兴奋得困也困勿着”。女生么还会再互相打开书包，看看别人带了眼啥好吃物事。一般来讲，红宝桔子水、小红肠、面包是标配，考究点个还会带水果、茶叶蛋。至于饮用水么就装辣墨绿色个铝制水壶里。搿种水壶看起来就像军用水壶，其实就是民用品，杂货店里侪有卖，相当结实也耐摔。虽然体积看起来勿大，但是装个水量基本可以满足阿拉搿点小朋友一天所需。

　　春游去得最多个地方当然还是公园，人民公园个儿童乐园、长风公园个银锄湖、西郊公园个象鼻头侪是阿拉记忆当中印象最深嗰。除了看动物，最好白相个项目应该就是划船了，一边轻轻哼唱《让我们荡起双桨》，一边辣暖暖个阳光里荡舟湖面，真是要多惬意有多惬意。值得一提个是，埃歇辰光公园里呒没电动船，每条船浪侪配备4至6把木桨，需要大家动手划嗰。

　　通过划船，我第一趟体会到啥叫“看人挑担勿吃力”。木桨划到水里可以明显感觉到水个阻力，一次两次勿觉得，划个次数一多，还是邪气吃力嗰，上岸后伸出来个每双手侪通通红。也是通过划船，我第一趟晓得了齐心合力个重要性，否则船就只好辣辣水里向原地打转，简直急煞人。

　　现在个小朋友可以去春游个地方越来越多，科技含量也越来越高，但是每趟听到小囡讲学堂组织去某个室内场馆春游，我总归会有点失望，总觉得春游么就是应该到大自然当中去，吹吹春风，闻闻花香，吃吃零食，辣辣草地浪向滚一滚，搿个才能真正体会到春天个味道呀……