春天里好吃物事交交关关，价钿比较亲民个，应该是螺蛳。同时段，一斤香椿头要七八十元，一斤螺蛳只要6元左右。讲到底，伊也算荤腥个呀。

　　再讲，同样是春天里个螺蛳，清明前个更加稀奇一眼，因为搿歇辰光个螺蛳还呒没到繁殖期，也就是，侬可以放心嘬，不会嘬出一包小螺蛳来。又加上搿段辰光里向个螺蛳，口感比较丰满，肥笃笃。所以，一向就有“清明螺抵只鹅”个讲法。

　　螺蛳有各种各样吃法。比方讲，有趟仔到常熟去白相，就吃到过用螺蛳烧汤嗰，里头还杂七杂八摆仔交关物事，黄鳝、蛤蜊咾啥，当然是鲜得眉毛要落下来。

　　最常见个做法就是用葱姜炒了，摆点豆瓣酱，螺蛳壳浪还有咸味道。考究点嗰，应该是拿螺蛳肉一只只挑出来，烧豆腐，或者用糟卤煨。再新点个么，也可以烫熟仔蘸芥末吃。

　　今年春天，住辣朱家角个闺蜜约仔一帮人去伊屋里白相。伊提前一天买好螺蛳，滴两滴麻油辣水里，拿螺蛳肚肠养得清清爽爽；炒个辰光也就简简单单摆眼葱姜调料，最后淋一点点生抽提鲜。坐辣河旁边，端一碗螺蛳，哦哟，搿个感觉远远超过嘬一碗螺蛳带来个享受。