我五岁个辰光，阿拉屋里向从南京西路个弄堂搬到新造个大学家属宿舍。印象里，当年个大学校园就像一座世外桃源，一年到头鸟语花香，还有一股书卷气。阳光透过树丫枝洒辣绿茵茵个草地浪，道路两旁侪是粗壮个梧桐树，树荫里有着一幢幢红砖青瓦个教学楼、图书馆、实验楼、大礼堂、学生宿舍，以及拥有400米跑道个大操场……

　　埃歇辰光我年纪小贪白相，放夜学回来就朝校园里跑，我是辣辣充满野趣、童趣个大学校园度过童年嗰。

　　开春，池塘里个小蝌蚪只有黑米粒大小，慢慢看伊长大：先长出两只脚，后来是四只脚，尾巴脱落以后长得快起来，好像一记头就变成了大青蛙。到树下头和河边浪挑荠菜和马兰头是我个拿手好戏。桑树长出嫩芽个辰光，我又开始养蚕宝宝，刚刚从蚕籽里向爬出来个蚕宝宝是咖啡色嗰，又细又小，慢慢交变成肚皮亮晶晶、白颜色个一条条大蚕宝宝，后来伊吐丝拿自家囥辣茧里向，再到破茧出来撒籽，最后变成蚕蛹。

　　夏天，树浪向知了不停叫“热煞啦、热煞啦”，跟楼上阿哥一道爬树捉知了，总归好捉牢几只。

　　秋季里，校园里金桂、银桂搭仔丹桂像小金盏挂满树枝，香气扑鼻。我会用小绢头摊辣地浪向，拣拾落下来个桂花，拿回去给姆妈，做成糖桂花，放辣绿豆汤里，比汽水好吃交关！

　　冬天，搭小朋友一道堆雪人。两只煤球当眼睛，一根红颜色个绒线当嘴巴，再插一把破扫帚当手臂，样子看起来邪气滑稽。

　　不过，记忆里当年最开心个事体还是做姆妈个小助手：我摘艾叶，姆妈做青团。当大树下底长出一蓬蓬碧绿生青个艾草。我就卖力个摘艾草嫩叶，一歇歇功夫就可以摘一篮头。姆妈拿艾叶先焯水，去脱苦味道，斩成碧绿个馅子。摆一眼发酵粉，再放一点糖精水，搭仔面粉一道捏，等面团发酵了，做成青团放辣蒸笼里向蒸，只要几分钟就可以蒸熟。我来煞不及，捏牢一只就咬，嘴巴里侪是艾叶个清香，还有糖精个甜味道。二只吃下去总算填饱肚皮！其实，迭个只是用面粉做个实心青团，顶多算是青团糕。

　　过脱一个礼拜，住辣虹口个亲戚要来阿拉屋里做人客。招待亲戚个小菜除脱黄芽菜炒肉丝、红烧带鱼、荠菜豆腐羹等等，青团也是必不可少嗰。摘艾叶照样是我个事体。姆妈拿省下来个一包赤豆，用小火焖酥，拿纱布挤出豆壳，一大碗红豆沙加白砂糖再加上一小碗猪油，摆辣锅子里一道翻炒，猪油豆沙馅就出炉了。用糯米粉、艾叶、猪油豆沙馅就可以做真正个青团了。

　　青团下面垫一片粽叶，放进蒸笼，等锅子里热气冒出来，一股艾叶个清香也一道飘出来。闻到味道，我就会急吼吼跑到厨房间，问：“姆妈，啥辰光蒸好啊？”

　　等到蒸笼掀开，我搭仔阿姐侪会凑上去看，结果总归是被姆妈笑嘻嘻赶开。吃饭辰光，照规矩，必须等客人先动筷。饭桌浪向个青团是每人一只，其他多做个青团要包起来，给亲戚带回去。姆妈看我还是一副猴急相，往往会拿伊碗里个青团塞给我，嘴巴里讲：“拿起吃口伐，侬迭只馋痨坯！”

　　后来我长大了，有几年清明节，我又到校园里去过几趟，想寻点艾草回去自家做青团。只看到大树下面、河浜旁边，侪是一片片个麦冬草，一根艾草也看勿见了。虽然现在商店里青团品种交交关，但是我就想吃小辰光姆妈做个艾叶青团！