阿拉读小学到四年级额辰光就有珠算课了，大人侪会搭小人去买只算盘。挨个辰光阿拉屋里向已经有一只老早子传下来搿红木算盘，阿拉姆妈讲节约一点就好勿要去买了。我勿肯，吵了要去买只新算盘，我讲人家同学侪拿彻骨里新搿算盘，我拿只分量老重额旧算盘去，一眼面子呒没格。阿拉姆妈一面讲我不懂事体，一面只好搭我去买一只轻巧点搿新算盘。姆妈拿算盘两头扎好绳子，我开心得不得了，背起来就蹦蹦跳跳去学堂，一路上算盘发出有节奏搿声音。

　　自从有了珠算课，同学侪拿算盘当游戏机白相。当时阿拉上半天课，还有半天就搭屋里向大人讲要练算盘，要么叫同学来屋里，要么阿拉去隔壁同学屋里，我会拿出红木算盘，先背背口诀，打了一眼辰光就开始白相了。因为，红木算盘有分量拨起来声音响，白相起来有战斗力。两个人对垒，侬拔过来我拔过去，侬吃特我，我吃特侬。想赢还要动脑筋，每趟赢侪开心得不得了，输脱了就要被刮鼻头，一只算盘可以白相交关辰光。而且，白相了再多辰光眼睛视力勿会坏，阿拉挨个辰光小人近视眼老少个。

　　长大了，后来我又去了银行上班，看到柜台浪侪摆了算盘觉得老亲切个，小青年还要进行珠算比赛，有搿小青年平时苦练基本功，手指算盘拨得老快了，多少数字侪难不倒伊拉。勒自家银行里向比赛优胜者，再到市里向去比赛，到全国去比赛。得了名次回来还要开表彰大会。光荣得不得了，伊拉讲银行里老法师侪是搿能过来个。

　　时代变化老快，一转眼睛柜台浪算盘通通没了，电脑上柜了。学堂里也不学珠算了。有一趟我看到银行里一间房间里侪堆满了算盘，要准备处理脱，我觉得老好奇，又觉得可惜。我回到屋里，问阿拉姆妈老早子算盘还勒勒口伐。姆妈讲还勒嗨。拿出来让我看，我看看一眼勿觉得伊旧搿。看到算盘还想起小辰光交关事体。蛮有趣搿事体。

　　当然，阿拉小人更加勿会得用算盘了，侪用电脑了，上班离勿开电脑，回屋里向马上开电脑，听到我讲阿拉小辰光白相算盘，还觉得勿可理解。是搿，算盘再也勿会用了。不过，我小辰光觉得太重的红木算盘勒我眼里变得老珍贵了，就像艺术品一样，我勿想处理脱伊，搿也好算是历史个见证了。