上海迭个城市辣拉快速发展，与此同时，产生个垃圾也邪气结棍，葛咾现在要强调垃圾分类，搿能介好拿垃圾里向还好派用场个物事充分利用起来，让垃圾个数量大幅度个减下来。其实辣拉阿拉小辰光，就已经有得垃圾分类个做法，只不过迭个工作勿是辣拉掼垃圾个辰光，而是事先通过废品回收搭仔干湿垃圾分开。记得搿辰光，每条弄堂里侪摆了一只泔脚甏，乃末每家人家个淘米水，拣下来个菜叶瓣，吃下来个鸡骨头、鱼骨头咾啥侪会得倒进去，每日有专门人来收集，随后拿迭只甏汏了清清爽爽，呒没一眼臭味道。屋里向个干垃圾，大多数侪送拨废品回收站，搿辰光个废品回收站老多个，出门勿到五分钟就有固定个回收站，有辰光还有人摇铃专门上门来收购。葛咾老便当个。乃末，回收个品种也邪气多，像玻璃，瓶子，布，报纸，书籍，破铜烂铁，橡胶，牙胶管，猪骨头，桔子皮，鸡肫皮，甲鱼壳，坏钢精锅，旧锡壶，甚至头发也可以收。只要侬想要掼脱个物事，基本浪向废品回收站侪可以统吃。搿能介一来，真正掼辣垃圾桶里向个物事就只有一眼眼了，好像只有煤球灰搭仔屋里向个灰尘了。废品回收收去个物事还好通过回炉加工咾啥重新发挥作用，老百姓也好调眼小菜铜钿，搿能介大家侪捂心。

　　勿晓得啥辰光开始，泔脚甏取消脱了，废品回收站也一只只关脱了，乃末屋里向要掼脱个物事寻勿着出路，只好朝垃圾箱里厾，葛咾勿怪啥个垃圾侪混辣一道，勿怪好利用个还是呒没用场个侪车到垃圾填埋场，垃圾越来越多，垃圾吃脱土地，吐出臭气，污染空气，破坏环境，搭阿拉现在个文明社会碰勿拢。乃末现在正规个废品回收侪呒没了，只有一眼游击队辣拉南征北战，收购个品种也老少个，只有报纸杂志书籍，饮料罐头（铁的勿收），包装盒咾啥，而且价钿便宜得要死，侪讲样样涨价就是废品价格稳定，还往下跌脱点。有辰光几个号头积下来，只调来几块洋钿，葛咾有种人也勿肯花搿眼心思，干脆往垃圾箱一厾了事。葛咾有辰光想想老底子个废品回收就蛮贴近环保要求个，勿晓得为啥搿能好个传统要掼脱。现在回过头来又要重新提倡垃圾分类，废物利用，走了介大一段弯路，兜了一圈还是回到原路上来。

　　有句闲话讲，呒没勿派用场个垃圾，只有放错地方个资源。现在科技越来越发达，交关原来当垃圾掼脱个物事，侪开发出新个利用价值。所以，垃圾分类，废品回收搿桩事体邪气要紧，虽然现在要恢复原来个废品回收有眼勿现实，但辣拉掼垃圾个辰光分类分得清爽一眼，还是应该可以做到个。前一腔，上海市绿化搭仔市容管理局，市文明办，市妇联联合向全上海公开征集“上海市生活垃圾分类宣传口号”，阿拉也去凑了一记闹猛写了一句口号“垃圾分分类，分量少交关，资源派用场，环境邪气崭！”希望垃圾能够多利用一眼，环境能够清爽一眼，大家个生活幸福快乐一眼。