秋风一起，就是斗蟋蟀个好辰光了。蟋蟀，上海闲话里称伊为蹔蛭。搿蹔蛭两个字讲讲便当，要能够写出来就是一门学问了。我虽然辣复旦读了中文系，但假使隔忙头里写出来搿两个字要我认，我举手投降，我读勿出、认勿得。蹔蛭，我是从《上海话大词典》里寻到个。要读出来，音同“暂吉”。现在上海个年轻人用上海闲话来发短信，流行个是音同就可以了。伊拉不讲究以词典里规范非常个字眼来书写。我是学习上海闲话个俗家弟子，我欣赏新流行。不过此地我还是写成蹔蛭，大家只要记得伊读出来为暂吉。

　　辣老上海要去捉蹔蛭有交关好去处。公园、绿地里、冷僻个马路边，甚至小弄堂个角落里。我读书个磐石私立小学解放后改名为重庆南路第二小学。小学旁边有一块外国坟山。早就荒芜了，只剩了一个老伯伯来把门。一到秋天，阿拉搿班捣蛋鬼就翻墙进去捉蹔蛭了。老伯伯有兴致个辰光就来捉阿拉。大家一哄而散，逃到弄堂里去检阅战利品。雄的蹔蛭上海称为二尾子，雌个叫做三尾子。搿“尾”是读成“妹”个。要写出来，“枚”也可以。二尾子会斗，一副大牙咬牢对头，胜利了辣追杀中还振翅鸣叫。三尾子捉来了只是和二尾子做个伴、结结铃。蹔蛭生性好斗。伊一旦落败就万念俱断，再也不肯与人家来厮杀了。失败个蹔蛭，上海人叫伊为败鬼蹔。败鬼蹔个唯一出路就是送拨弄堂里低级别个小囡去养。败鬼蹔用冷水一激，再来个掼三掼——抛到空中，接牢后再抛，弄勿好又来了斗志。不过败鬼蹔马上又会露出马脚，稍一匹敌强者马上就会掉头逃窜。因此败鬼蹔又被称作为二先生。变成了二先生的蹔蛭会有生路个，小朋友会寻一片破砖乱瓦或者草地乱岗去放生伊，希望明年伊能生出一堆新个战士出来。

　　旧时个上海滩上还有不少个蹔蛭市场。延安路、连云路口子旁个新城隍庙前就有一个。蹔蛭上品个是养辣陶制个圆盆里供顾客挑选。装辣三寸长个竹竿筒里个蹔蛭就算是统货了，价钿就便宜多了。只要侬运道好，统货里也会买到极品个好蹔蛭。伊个辰光最显贵个品种算是浙江杭州地区个蹔蛭，品相好、个头大、生性猛，俗称杭蹔。市场还有各式各样弄养蹔蛭个用品，从盆到缸、从捉虫用个网到打虫用个草，应有尽有。搿里是阿拉小辰光最欢喜去个地方。现在上海早已经捉不到好蹔蛭了。胃口好个朋友是驾了车奔到山东去捉蹔蛭个。外地比本地蹔凶得多。搿大概也应了俗话：“外来个和尚好念经。”哈哈。