阿拉小区有一个退休个火车司机人缘邪气好，搭伊同辈个人叫伊阿亮哥，小一辈个人喊伊老爷叔。老爷叔退休以后，日脚过得有滋有味有规律。早浪向伊总归要到小花园里散散步，再到小区门口大饼摊浪吃一碗咸豆浆搭一只甜大饼。勿过春节辰光做大饼人家勿出摊了，伊只好辣屋里向吃咸菜花生米过泡饭。早饭吃好伊就到菜场买菜，菜买回来交拨老太婆，伊就坐辣沙发里听广播。中饭吃过伊会得打一歇瞌 ，醒过来吃好一杯茶就到老年活动室去。 

　　侬勿要看老爷叔搓勿来麻将打勿来牌，伊最欢喜看《新民晚报》搭仔《参考消息》。伊一面看报纸一面跟人家茄山河，从国际形势到国家大事，讲得头头是道。伊文化水平中专，勿过迭眼水平是扎扎足足勿打折扣个，大家侪老买伊账个。活动室离伊拉屋里只有200米左右，伊走回去起码要用廿分钟。为啥呢，看到熟人欢喜就聊两句，人家有啥个烦恼啦勿开心啦，伊就开导人家；听到有啥好白相个事体，两家头就哈哈大笑。回到屋里向，老爷叔就拿出一块揩布，拿木头扶手从六楼到一楼认真揩一遍。人家表扬伊，伊就讲，自家年纪大了，走楼梯离勿开扶手，揩揩清爽自家人家侪方便。迭桩事体做好伊就坐辣厨房里向看老太婆烧夜饭，吃好夜饭看脱一歇电视就睏觉了。勿过有辰光伊个生活规律也会打破个，葛末肯定是儿子女儿孙子孙囡来了。搿两个小囡一回来末，赛过淘箩里个田鸡跳出来仔，闹猛得勿得了，老爷叔只晓得跟伊拉混辣一道，疯辣一道。小囡回转去了，老爷叔个生活又恢复了原来个规律。