上海开埠以后，是一个世界浪最早世界化个城市，欧美个“国际性大都市”里当时侪缺东方人个。上海城里，中外激荡，西风东渐，江南文脉汇聚，从籍贯来看，上海人，就是“东方全球人Oriental Global Man”，搿个就使得上海个市俗民风麇集浸润了中西融合个、辣竞争当中取胜个优质文化，大气谦和。

　　首先，上海人讲究“派头大”，就是举止行为有气派，有格调，讲体面，品格、风范高雅。据说“派头”一词来自英语Patten，搿个词语到了上海，就重点突出了伊个“行为型式”个“格调”含义。上海人见过大场面，中气实力足，派头就“掼”得出，勿但做出来个产品，待人处事个做派，侪讲究“上台面”、“有台型”，那怕造出来个“中国银行大楼”、“国际饭店”，也派头十足。

　　上海人辣场面浪讲究气派魅力，对自家却是重视律己，治家崇尚“做人家”。要做好一家人家，就要“节俭”，“富有富个过法，穷有穷个过法”；“算算吃吃，吃吃算算”，搿个是“移民客居”都市社会中打造出来个上海人个本色，因为伊拉邪气珍惜太平生活个来之勿易。“小乐惠”成为交关市民心底满足个生活方式。伊拉对小辈从小样样做好“规矩”，“坐有坐相，立有立相，走有走相，睏有睏相”勿算，尊长敬老，敬惜字纸，重视文化……朝有身份人家个一套家训看齐。上海人个“做人家”、“精打细算”，曾经创造了承担得起连续40年个83.94%上解中央财政收入个奇迹。

　　上海人生活情趣追求精致，养就了处理人际关系辰光，讲究识时务，深得“识相”之道。办事体往往是先“轧苗头”，察言观色，搭自家选择一个最适宜个地位，恰如其分施展才华，注意“安分”、“知趣”，尺寸浪向“候分候数”。矜持勿张扬，勿随便去冒犯对方，常常敬告人家，“勿识相要吃辣货酱”。就是对“帮忙”，上海人也是有明确界线个：辣辣友好场合，“帮帮忙”就是互相合作，互相搀扶；过分了，就是“越帮越忙”；假使干涉到别人私事了，“帮帮忙”就是让侬走开，勿要瞎搞，而且还蛮讲风度个，叫侬一声“朋友”：“朋友，帮帮忙！”侬就勿要再勿识相了！勿去影响别人是一种都市社会个文明，上海过去幼儿园里有一首儿歌：“走路轻，说话轻，放下物事也要轻，勿要老师告诉我，自家也会轻。”

　　发达个商业文明，培养起上海人搭朋友交往、合作成事个素质：大路。“大路”就是做事大方，气量宽宏。交往处事个底线就是“上路”。言语“脱头落襻”、做事“自说自话”，就是“勿上路”。要是行为“脱线”、尽走“歪路子”，甚至做出“落挢”个事体来，就要告伊“对勿起”“拜哎拜哎”了。

　　上海人认为一个人个聪明，表现辣伊个脑子是勿是“拎得清”浪向。“接翎子”要快要准，处事要贴心贴肉，深懂游戏规则。上海人甚至认为“拎得清”搿一点可以衡量一个人个综合素质，勿论伊是啥个来历，身份哪能，“拎勿拎得清”是条公平线，既是信誉，也是效率。碰着事体“拎勿清”个人，就叫伊“洋盘”、“阿木林”了。

　　近来，辣青年当中，又产生了一个惯用语，叫“有腔调”。搿个是生活辣21世纪个上海人对自身修养又一个高标准。当代人个格调气派是啥物事呢？伊拉提出了现代化个要求：行为举止要时髦、潇洒、风度翩翩，有个性、有型、有内涵、有气质。只要是不想out个朋友，就要做个“有腔调”个人。一时勿来事个闲话，就要通过“拗造型”拗出来，搿个就叫“in”。