上海人讲究噱头。上海闲话里个噱头，意思摸老老。噱头，可以是引人发笑个戏话，可以是叫人注目个花招，也可以是功架十足个打扮。唱滑稽戏个，放出噱头出来。骗人家上当个，摆只噱头过去。就是一个人穿着时髦、扎足台型，大家也会来捧场表扬伊：“喔哟，噱头势勿得了，叫大家眼睛也张勿开哉！”上海人还讲：“噱头噱头，就是要噱辣头上。”头上做功课、头上做功夫，理发店、美发厅个生活。理发也好，美发也好，只是店面招牌上个官话。以最俗气也是最平常个上海闲话来讲，男人叫剃头，女人叫剪头发、汏头发、烫头发、做头发。女人个花头经要比男人多出勿勿少少。女人难服侍，由此也可见一斑。

　　到剃头店去，小囡剃小囡头，学生剃学生头。年纪再上去点，男人个花头也来了。老上海最流行个是小分头。辣头上个左侧或右侧开出一条头路来，头发就按三、七比例兵分两路。因此小分头也叫做三七开。为了让头发服贴，剃头师傅还要为客人吹吹风。考究一点个，还要上点生发油。现在个马路上还可以见到一些头势清清爽爽个老先生，三七开，弄得干干净净个发型。搿样个老先生一辈子就剃出一只造型，从一而终。大包头，顾名思义就晓得头发不分头路，由前朝后包了过去。大包头摆到北方去就称之为大背头。大包头上油水撸得十足个，上海人就叫伊为奶油包头了。几十年前，奶油包头还一度是上海滩上小阿飞个别称。正派人家出来个年轻人是勿作兴弄成油光光个奶油包头个。为了便当省力，上海人还欢喜剃只平顶头。平顶头剃得细致一点个，也有个称呼叫游泳式。因为头发只留得寸把长短，平顶头还拨年轻人叫做板寸头。张明敏唱出《我的中国心》个辰光，赶潮流个朋友就跟紧理只大分头了，头路开辣贴当中，头发五五开。整理头发个辰光，两手左右开弓按摩遮过耳朵个长发，噱头势勿是一眼眼。

　　光头球星、光头明星个涌现，剃只光郎头就勿是老伯伯个专利了。老里八早弄只光郎头上街，人家会怀疑侬是不是刚刚吃满官司。现在光郎头也算是时髦个造型了。一般个理发店都剃勿来光头。剃光郎头个多半是靠自家个本事来料理。哪能弄？卖只关子，下趟有空个辰光再来面授机宜。哈哈。