现在人们过年回老家，可以乘汽车、高铁，甚至飞机，交通非常便当，但我小辰光回老家先要乘一天一夜火车到常州，再转乘小火轮。

　　小火轮是一种木船，由蒸汽机驱动，船身宽约2米，长不到20米，船上客舱两边有玻璃窗，窗下有给客人坐个长板凳，两头是舱门，船顶外部涂着一层柏油。驾驶室在船头，里向除了方向盘，还有一只拉手柄，可以控制汽笛，在启航、到达或与他船相遇时就会鸣响汽笛。小火轮速度很慢，不比走路快多少，再加上途中会停靠多个码头，上下客和装卸货物，路上花费时间就更长了。

　　当时大家工资侪不高，呒没钞票也呒没辰光出远门，所以轮船码头一年到头冷冷清清。哪怕逢年过节，船浪向客人也勿多，勿像现在个车站码头一到过年就人山人海。或许就是因为乘客少，搿种小火轮每天只有一班，清早六点钟开船，夜快点到目的地，全程五六十里路，开开停停要八九个钟头。爷娘讲，要勿是大包小包给老家亲眷带礼物，情愿步行走回去。要是火车晚点，不能及时赶到码头，那就糟糕了，要末靠两只脚慢慢走回去，要末就要住旅馆多等一天，但是住旅馆开销太大，所以一般侪是步行走回去。

　　记得我刚刚读中学个头一年，爷娘带我回老家过年，本来算好到轮船码头还有辰光可以吃点物事歇歇脚，啥人晓得搿趟火车脱班，走出车站离开船已经呒没多少辰光，等阿拉一路狂奔，眼看要到码头了，就听见开船汽笛响了起来。搿辰光，阿爸抢过我手里个旅行包，对我讲：“快，侬先奔过去，叫伊拉等等阿拉。”等我上气勿接下气奔到码头，看见船工辣辣起锚，我就“爷叔爷叔”穷喊，搿位船工看我跑得满头大汗，答应再等一等。阿拉一家门才终于乘上了这趟轮船。

　　讲起了，这种小火轮一路浪向要用八九个钟头，倒勿是因为速度太慢，而是因为搿种轮船主要是货运，客运只不过是带带过个。我每趟乘小火轮，船后头总要拖交关木船，少则五六条，多则十来条，每条木船侪装得塌塌潽，船帮几乎与水面齐平，这样哪能会开得快呢？过去，搿种小火轮辣辣苏州河，黄浦江里经常开来开去，最多个一次，我看见一艘小火轮拖了十八条木船。

　　搿种小火轮虽然又小又慢，但是当时老百姓出行搭仔城乡物资交流个主要工具，特别适合地面交通勿发达，河道四通八达个地方。

　　小火轮老早就淘汰了，现在阿拉回趟老家，乘高铁只要两小时，外加老家亲戚会开轿车到车站来接，所以只要早上定定心心走出门，到老家笃笃定定吃中饭，一点勿用担心。