一顿年夜饭，吃啥有讲究；

　　烤麸要如意，河虾要红透；

　　冬笋脱苦菜，红烧肉要弹；

　　鳜鱼有点贵，少伊勿能够。

　　每到大年夜，一家门闹闹猛猛坐勒一道吃顿团圆饭，就叫过年。

　　上海人年夜饭台子浪向，有几样菜是眼勒板要有个。

　　比方讲，四喜烤麸。烤麸就是靠夫，老底子屋里赚钞票侪靠男人，所以，祝屋里男人健康快乐是硬道理。

　　比方讲，油爆虾，新鲜河虾用油炸透，颜色红堂堂，寓意万事红火。现在饭店索性推出一种元宝虾，名字直别别，粗俗着一眼。不过，有财宝辣辣眼门前，也呒没啥人会板起仔面孔，嫌弃铜臭味道太浓。

　　再比方讲，鱼是一定要有个。只不过从前大人会讲，迭条鱼今朝勿好动，要摆到明朝哦。意思是，从今年三十到明年初一，年年有余。想想，搿可能跟从前经济状况有关，难得吃条鱼，当然是作人家点。摆到现在，大人一定坦坦气气：快点趁热吃，隔夜就腥气了。

　　吃啥鱼也是有讲究呃，青鱼，是上海人欢喜呃，不过，整条上来有点搪勿牢。所以，要末做成爆鱼，要末做成划水、肚档，浓油赤酱，侪是经典本帮菜。

　　可以整条上来个是鳜鱼，大小适中，肉质细腻，就是价钿贵一点，特别是过年辰光，可能要比平常日脚翻一翻。

　　不过，吃呃就是伊个贵呀！