想起从前小辰光，肉饼浪向蒸只蛋；煤球炉边骨牌凳，有滋有味一顿饭。

　　吃煞勿胖是福气。从小欢喜吃肉，偏偏人长得细骨伶仃，畀住辣阿拉隔壁头个胖阿姨讲起来，叫“吃煞勿胖长煞勿大”。

　　有两样末事顶欢喜。

　　一样是肉饼子蒸蛋，总记得伊个辰光爷娘侪上班去了，中饭事先准备好。煤球炉子浪向一只钢盅镬子，顶顶常见个是一碗白饭一碗肉饼子。夹精夹油个夹心肉买来，斩成肉糜，摆酱油、盐、糖还有葱花，充分搅拌后，隔水蒸熟。然后温了炉子浪向。

　　吃饭辰光到了，镬子盖头一开，奇香无比。肉饼吃脱了，最后一点点肉卤也是好末事，饭倒进去淘一淘，夯畀浪当侪吃下去，一粒饭米糁一滴猪油侪勿浪费。

　　还有一样是大排骨。从小到大吃食堂，一块大排骨从一角八分吃到一块八角，味道总归勿变：一块块拍松后又着过泥个大排，辣汤汤水水里浸辣海，味道侪进去了。还记得住辣隔壁头个辣食堂里做生活个胖阿姨，每趟看到我排到窗口，一边笑着叫一声懒姑娘，一边认认真真拣一块大一眼个摆辣我碗里。

　　前两天去一家建材商店买涂料，正辣挑挑拣拣辰光，只觉着身后一股奇香袅袅而来，吸一口气问:今朝小菜阿是有蒸肉饼子？

　　老板呒没摒牢，笑了。

　　【沪语解释】

　　肉饼子：蒸肉糜。

　　吃煞勿胖：怎么吃也不胖。

　　夹精夹油：有肥有瘦。

　　夯畀浪当：全部。

　　饭米糁：饭米粒。