上海社会迅速从农业手工业社会走出,到20世纪一二十年代已经成为邪气成熟个商业社会，整套个商业金融业词语从上海话当中诞生。譬如现代纺织企业辣辣上海登场，一本《纺织工场——技术用上海语》1925年辣上海出版，里向就收集了1396个上海话纺织厂里行业用词，还有各个车间里向个常用语句316句。

　　商务活动频繁,再加上海人个活跃思维，使得交关原来辣商业范围里向用个词语扩散到百姓个生活里去，成为百姓嘴边个常用语。

　　先看从买卖当中跑出来个词语，上海人拿“买卖”两个字融化到事理人情当中去。像“卖相”就是由商品个外表讲到人个外貌，“卖样”就引申到拿物事出来炫耀拨人看。有意拨人好处，叫“卖人情”，承认对方个长处表示服从讲“买账”。假装精通,实际弄虚头骗人,叫“卖野人头”；“卖狗皮膏药”走出地摊形容自我吹嘘、弄虚作假。 

　　“做生意”个词语也蔓延到生活浪向。“掂斤两”原来是估估货物个轻重，后来上海人用到试探估计对方个实力搭作用当中去；“讲斤头”从一斤一斤讨价还价里跑出来,变成谈条件各勿相让或者高低攀比个代名词。“抢生意”，引申到抢事体做个意思；“兜生意”，扩义成推介；“放生意”，用到辣江湖浪设圈套。上海人拿看勿入眼勿像闲话个行为，侪斥责为“勿是生意经”,表示坚决勿答应或者勿妙了个意思,也叫“勿是生意经”。

　　交易里讨价还价也有新个意义。“有还价”，蔓延到有商量余地或者有条件需议；“呒没还价”，就是一口承诺个意思。“肮三(源自on sale)”从大跌价引申到形容令人失望勿快，或者指人勿正派。某人思想勿合时尚，讲伊“勿领市面”。“塌便宜”、“揩油”转到轻佻打人或抚摸女人敏感部位个侮辱行为。怪罪对方呒没听清自家个话，讲伊“耳朵打八折”；打你一个耳光，讲“拨侬一只五分头”。

　　“票据”是商业交易个单据,也引申到生活当中去。“打回票”,现在用到人或者物事拨人家退回个意思；“打包票”原来指写了一张保证成功个单据,现在泛指一种保证,有包辣自家身浪个意思。“空头支票”、“远期支票”，侪可以指勿能够兑现个虚空允诺。

　　“算账”也翻新到日常交际浪去。像“倒扳账”，用来讲事体完结以后又重新翻出来再搭伊搞；“翻老账”是拿过去个体再【tou,抖搂】出来；“勿关账”成了不管个意思。对人告事体勿服气或者勿拨面子,常常讲“勿买侬个账!”事体做糟糕了, 头绪理勿清，称“一笔糊涂账”。

　　再看商店，“装门面”，后来引申为人摆出一副老来三个样子，假痴假呆装得像煞有介事个样子。“上台面”原来指商品放到台面浪来要像样，后来可指人个举止言行落落大方。

　　辣辣店家早晨开张个辰光，老板拿每日算账个算盘一摇：“开盘！”，到夜快打烊，又叫：“收盘！”乃末清点存货就叫“盘点”。后来“盘”字就变成“价钿”了,大减价叫“大放盘”。老板察言观色，看见“客边人（外乡人）”，对伙计叫一声“客盘”，伙计就会加价欺负“客边人”；看见洋人来到，伊又叫“洋盘”，伙计就用“洋人加倍”个价钱算账。后来上海人拿“洋盘”引申出去嘲讽勿内行、勿识货、缺乏经验，常常上当又勿觉察个人，甚至变成形容词,拿“勿内行、勿识事”称为“洋盘”了！