搿次2014央视春节联欢晚会主持人个名单中出现张国立，勿由让我想起了2000年张国立和邓婕到阿拉屋里来个事体。 

　　1997年开始，到2000年，古装连续剧《康熙微服私访记》分三部播出，红遍大江南北。康熙个扮演者张国立也拨大家所熟知。2000年4月，上海电视台正辣播放《康熙微服私访记》第三部中个锦袍记、食盒记、铃铛记。张国立到上海，想听听上海个观众对搿部戏个看法。

　　由于辣南京个一次勿成功个观众见面会，据说当时来个人哄得一塌糊涂，张国立和邓婕个手也被抓破，伊拉最后是从后门溜出来个。告咾到仔上海，伊提出勿搞见面会，只要到一家普通个人家去听听意见。最后么，竟然选中了我屋里，可能是阿拉住个张园离上海电视台比较近个缘故吧。

　　伊日夜里七点多，天色已暗，张国立和邓婕、《新民晚报》、《上海电视》等一帮媒体个人都到我屋里来了。

　　张国立问阿拉，搿部戏看？阿拉讲天天看，一集也勿落下。

　　我搭仔先生欢喜看“康熙皇帝”，对伊个“百姓的事儿牵着走”和“万事民为先”邪气欣赏；阿拉姆妈欢喜看邓婕扮个“宜妃”，伊讲“宜妃”漂亮。

　　我儿子当时只有小学四年级，伊特别喜欢看“三德子”，“三德子”辣剧中也是一个勿小个角色，老令人“发噱”个。再加上由屠洪钢唱个片头曲 “江山无限”和由戴娆唱个片尾曲“百姓的事儿牵着走”，富有高昂京韵大鼓个腔调，实在好听。所以我当时就讲了一句搿部电视剧是“老少皆宜”。

　　张国立听了一定老开心个，邓婕呒没发声音，只是抿着嘴巴笑。后来张国立讲，伊老早就听说上海个石库门，但从来呒没到过石库门房子，今朝总算看到了石库门是哪能样子，对石库门前厢房个大开间（32平方）和3米多个层高相当赞赏。伊当时讲想辣上海买一套石库门个房子，搿或许是一句玩笑闲话。

　　伊还讲，今朝到了上海一家普通个人家，也算是一次“微服私访”吧。

　　（本文选自新民晚报·新民网出品微信“侬好上海”，微信号：helloshanghai2013。传播上海文化，服务上海市民。大城小事，记得第一辰光微信“侬好上海”哦！参与互动，会有惊喜等着侬！）