张家李家，隔壁邻居，合用一间灶披间，抬头勿见低头见。 

　　两个号头前，张家媳妇搭李家囡儿为一桩小事体吵仔一场相骂。老早吵吵骂骂也有歇过，吵过弄过就算了。搿趟勿晓得哪能，做起冤家来。两介头碰着看见，头别别开，赛过像过路陌生人。一向闹猛个灶披间冷清交关。

　　大前日，两家人家个水斗也沉闷起来。淘米汏菜，水倒进去，笃悠悠，慢吞吞，漏起来死样怪气。慢点就慢点，好捱就捱。今朝捱勿过去了，终于彻底塞牢。面对面两只水斗，两斗龌龊水，一声勿响，一动勿动，闷对闷。 

　　楼浪杨家娘舅退休前垃物业公司做过生活，是一个沟路工。伊讲，毛病出垃门口外头个下水道。随即拿来家什要捅。两个女人一看，搿哪能好意思，连忙从娘舅手里抢过家什。 

　　弄堂里两只阴沟盖头翻开来，张家媳妇从东头用细竹爿捅，李家囡儿垃西面用橡皮泵吸，老娘舅“一二三”喊口令协调用力。一记，两记，三记……“咕噜噜”两只水斗里个水同时流进一条阴沟。 

　　“通了！”两个女人撩起衣裳袖子管，揩一把汗，侬看看我，我看看侬，笑了。