年夜头，两个娘舅拨外甥囡压岁钿，都是4位数个红包。外公讲：“比我老头子个派头还要结棍，伊拉真是一年比一年个甩水大！”上海闲话里个甩水，本意是讲鱼个尾巴。本帮菜里有特色个一只菜就是红烧甩水，用青鱼个尾巴切成几长条，以酱油、红糖、黄酒烧得浓油赤酱上桌。甩水引申开来，是指本事大、来头大。出手大方是本事大。还有是讲来头大个：“公司里今朝来了几个客户，阿拉总经理从来就呒没介毕恭毕敬个。看来伊拉几个人的的刮刮甩水老大个！”甩水大是老个上海闲话了。能够讲出搿句闲话个多半是六十开外个老上海了。

　　年纪轻个朋友讲浪头大。浪头大开始个辰光是指一个人个气势。“新来个头头浪头大的来要吓煞人，开口闭口要烫平办公室里混腔势个人，吃勿消！”后来浪头大被大家借用到虚张声势、言而勿实个意思浪去了。“侬勿要看主任浪头瞎大，其实伊到年底拨大家个奖金也发勿出，一点浪花也呒得！”浪头大还被上海人引申为气派大、场面大、出手大。“小张要请老同学聚一次餐，酒水订到希尔顿，浪头大得要命哉！”

　　浪头大还勿是极品。浪头大还勿希奇。最最能够超出人个想象力个是上海闲话里个掼浪头。侬想，海里江里河里个浪头拍上岸来，有朋友竟然可以拿浪头抓上来朝地上一掼、真可谓惊天动地、掷地有声了。浪头大还是虚个。掼浪头却是实个。举个例子：当年申花足球队放出空气讲要从欧洲请来阿内尔卡和德罗巴。大家讲申花浪头大。后来这两个宝货真个一前一后来到上海踢球了，大家只好惊叹：“申花老板迭一记浪头真个掼大了！几千万欧元个开销是真金白银，大家呒没闲话！”掼浪头要讲实力，要讲立升，要讲胆量。要是一介草民动勿动也来白相掼浪头，我劝侬省省。黄浦江里个浪头是后浪推前浪，一浪接一浪，一浪更比一浪高。侬一旦掼过一趟，扎过台型之后，侬还有后续手段？一掼再掼，啥人吃得消。

　　甩水大、浪头大和掼浪头，多多少少含有一些讽刺人与挖苦人个意思辣里面个。上海闲话个比喻和比拟常常是带有黑色幽默个。搭上海人个攀谈，尤其是与老熟人、老朋友搭讪是要竖起子耳朵好好惦惦其中个分量个。一勿当心，就会拿人家吃吃侬豆腐个闲话当成功了补药来吃。上海人是乐天派。上海人欢喜寻开心。就是拨人家寻了一趟开心也勿动气个，才是有肚量个上海人。