虽然讲，上海辣拉中国算是最早用上自来水个，十九世纪末，英国人就造了杨树浦水厂。但伊个辰光主要是拨租界里享用，还有石库门弄堂，每幢房子倒也有只“水龙头”。一般老上海，就呒没搿个福气了，再讲外乡人个棚户区就更加勿要谈了。棚户区有成千上百家人家轧辣一道个，也有零零星星搭辣租界夹缝里个。搿种地方就统统呒没自来水了。

　　后来政府跟租界当局辣拉外乡人集中个地方造了点公用水龙头，就叫“给水站”。上海最早个“给水站”有一百多年历史，直到1999年刚刚摘脱辣末一块“给水站”牌子。

　　我小辰光住辣麦琪里，辣拉乌鲁木齐路朝南一百米，右边上街沿浪向，就有一只“给水站”。因为沿街洋房后面有勿少本地人个老宅。我读书天天要从伊面经过。四平米左右一块水门汀，四周有一圈阴沟，靠里向当中竖了两只水龙头，有一米半高，下头有一条长长个水槽。水门汀一日到夜湿嗒嗒，勿论我是去读书还是回屋里，搿搭总归有交关人，挑水个队伍排了老老长，围牢水门汀有淘米、汏菜，汏衣裳、汏被单个，外加还有凑牢仔阴沟洞淆马桶、汏夜壶个。尤其到热天介，闹猛得勿得了，勿仅用水个人多，还有不少光屁股小人索性直接辣拉龙头下面汏浴，还嘻嘻哈哈、水溅得一天世界。水门汀个边浪向有只木头个小亭子，是管理员个，因为长久勿刷油漆，整只亭子黑黜黜，刚刚够一个人勉强坐坐。亭子个板墙上有一块白底蓝字个搪瓷牌子，上头有“给水站”三个字，好像还有编号咾啥个。管理员负责卖、收“水筹”。一根筹子一桶水，桶好像勿分大小，你拎得动、挑得起就拉到。伊个辰光水邪气便宜，对就地汏物事个统统毛估估收点筹子。各种各样个水桶，木头个、铅皮个、铁皮个、用火油箱改个；各种各样个扁担，竹头个、木棍个；一人挑个、两人抬个；各种各样个人，老个、少个、男个、女个，最多肯定是半老勿小个阿姨妈妈，伊拉辣拉一道根本勿在乎等候，有讲勿光张家李家个笑话，搿个是伊拉一日里顶顶难得个“外交”辰光。我走过时，老是喜欢朝搿搭张望，曾经想过啥辰光也来凑凑热闹。后来我已经记勿得到底搿只“给水站”是啥辰光“下岗”个，是“文革”期间，还是我下乡以后。现在想起来，“给水站”勿失为上海搿个大城市伊个时代个一道景观，一幅生动个风俗画。可惜，现在个小青年是看勿到，还很难想像得出来了。