讲起自己做物事，最早是上世纪五十年代中期，交关中学生辣辣学堂老师指导下头做起了矿石收音机。搿种收音机邪起简单，先用三夹板钉一只木头盒子，拿无线电商店买来个矿石、线圈等零件装进去，通上耳机，最后辣辣晒台浪树一根蛛网式天线，到自来水龙头浪去接一根地线，就可以收听到广播节目了。到六十年代初期，大家感到矿石机有点落后了，就开始动脑筋做半导体收音机了。阿拉先从无线电商店或牛庄路电料市场买来机壳、线路板、二极管、三极管、磁棒、扬声器、单联开关等零件，再按照《无线电》杂志上提供个线路图组装。做好以后，无论是外观还是收音效果侪比矿石机好，而且装上电池还可以随身带，邪起便当。

　　除了自己装收音机，在三年困难时期，上海人还为了节约布票、布料用零碎布头拼拼凑凑做假领头，做内衣内裤。就算勿会做裁缝生活个人，也会得七转八弯去寻会得做个人帮忙做。

　　后来，到了知识青年上山下乡个辰光，交关人家会从柴爿店里买点木板或者从厂里个垃圾堆里捡一点旧木料回来自家做箱子，好让屋里厢个小囝下乡个辰光装衣裳用。还有人家想到小囝到了农村后勿会烧灶头，就到虬江路旧机电市场买来铁皮自家敲煤油炉子，让小囝带到乡下头去烧饭烧菜。

　　呒没多少辰光，敲煤油炉子个热潮就蔓延到了一些企事业单位个单人宿舍里，单身汉们或为了改善伙食，或为了辣辣女朋友面前卖样、扎台型，也起劲个敲起了煤油炉。伊拉敲出来个煤油炉比弄堂里敲出来个挺刮得多，因为单身宿舍里向工种齐全，制图员、板金工、电焊工、车工、钳工……要啥有啥，所以伊拉合伙敲出来个煤油炉绝对弹眼落睛。

　　搿里讲到了迭些手浪向有车、钳、刨技术个人，后来还做出交关大家欢喜个物事，比如烫头发用个夹钳、烫衣裳用个熨斗、各种形状个开啤酒瓶扳头……伊个辰光，手里有几样搿种物事老出风头了。

　　讲到做烫头发个夹钳，搿里还有个小插曲，就是阿拉隔壁个小阿姐自家倷夹钳烫好一头个卷发以后感到蛮好看个，就跑到照相馆里去想拍张照片，呒没想到拨照相馆师父一口拒绝：“阿拉照相馆是勿拍卷头发个照片个，想拍，回去倷头发弄直了再来！”呒没办法，小阿姐只好回到屋里向照镜子自家欣赏。

　　到了上世纪七十年代，有交关青年朋友到了结婚年龄，但是结婚个嫁妆难办啊，像大衣橱、五斗橱、脚踏车等等侪要凭票供应，手里向呒没购物票，物事就买勿到，婚就不好结，搿哪能来讪！于是伊拉就想办法自家做。

　　先凭结婚证到木材商店里买做家生个木料，再到家具商店里去驳样子，最后按照驳来个样子做出大衣橱、五斗橱、夜壶箱。当然油漆搿挡生活阿是自家做。到油漆商店里去买来猪血、老粉搭子油漆，经过内行指点，一道工序一道工序做，考究个还会上点蜡克。做好以后，样式搭子颜色绝对勿会输拨店里向卖个。

　　至于脚踏车，装起来有点烦，辰光阿拖得长，因为零件要到中央商场一样一样淘回来，特别是三角架、后飞，邪起难淘，就算侬每个礼拜日侪到中央商场去兜，也只好碰运道，碰着了就买，碰勿着只好空手回去。我当时就自家装了一部脚踏车，用搿零件侪是凤凰牌个。为了淘到全部零件就用脱一年半。

　　到了改革开放个辰光，大家开始追求洋气，就做起了玻璃橱、沙发等家具。讲到做沙发，迭个是要由木工生活搭子裁缝生活配合辣辣一道做个。当然辣辣一条弄堂里或者辣辣一个单位里，会做搿两样生活个人侪是有个，大家就互通有互，通力协作，侬帮我，我帮你，勿管是单人沙发还是三人沙发，一样样侪做出来，派头十足。

　　可以讲，老早上海人自家装收音机、装电视机、装脚踏车、做家具，侪是邪起拨人家看得起个一桩事体，怪勿得交关外地人讲上海人聪明，心灵手巧，会得过日脚，大概道理就辣辣搿搭。