小偷，上海人称之为贼、贼爷爷、贼骨头。扒手，上海人称之为扒儿手、三只手、八级钳工，还有就是“冲手”。查上海话词典，“冲手”寻勿见。既然上海闲话里有“出冲”，有“冲头”，此地就写成“冲手”吧。老底子，上海滩上个电车、公交汽车人多，人轧人人贴人，是“冲手”施展身手个好地方。我经历过搿样个事体，吓煞人。伊个辰光，我还是“红领巾”，半个大人。每个礼拜天早上要乘1路有轨电车到静安寺，去市少年宫学画图。上了电车，人是交关多，上车下车，大家轧来轧去。快要到静安寺站个辰光，我前头勿太远个一个阿姨突然叫起来了：“勿好了，我个皮夹子被人家冲脱了！”电车随声急刹车。车厢里一记头闹猛起来。

　　“勿要开门！‘冲手’肯定还勒车子上，捉伊出来！”

　　“阿姨立勒前车门。前车门个朋友勿要动，大家搜一下身！配合配合，搭牢搿只贼骨头！”

　　“侬又勿是警察！”

　　“去喊警察过来！”

　　一团混乱。一个业余“福尔摩斯”，四十几岁个爷叔让大家安静下来。“先问问清爽，再讲！”阿姨讲，伊一只红颜色、配有小拉链个皮夹子呒没了。里向有靠十元钞票。伊是中百公司上车子个。

　　“好了好了，好几只站头过脱了。‘冲手’老早下车子滑脚哉！”

　　“勿算大铜钿，叫啥个警察！”

　　“为了几块洋钿，浪费大家个辰光！”

　　“车子介轧，要特别当心！”

　　“好了好了，车子动起来哉！”

　　尽管落特皮夹子个阿姨勿情愿，电车又开了。到了静安寺，大家一哄而散。看了一场热闹，我轧下电车去等红绿灯过马路。手习惯性插进身上大衣个口袋，发现里向有样么事，摸出来一看，竟然是只红颜色有拉链个皮夹子。呆脱！一身冷汗。肯定是车上有人提出要大家搜身个辰光，贼骨头转移赃物，趁乱塞进了我个大衣口袋里。我搿伊个阿姨一样，是木鸡，呒没一点点警惕性。马上奔到马路当中个岗亭，一五一十讲给警察听，还交上了搿只皮夹子。

　　警察叔叔还是表扬了我。“好小囡，做得对！亏得当时呒没搜大家个袋袋，否则侬跳进黄浦江也讲勿清楚了！”再出一身冷汗。我差一点点就成为人赃俱获个小“冲手”了。如此，我还会有今朝么？人多人杂个地方，时刻警觉勿是一句空话。记记牢。