1975年我从农场上调回上海辰光正好25岁，垃拉当时已经算是大龄女青年了。我爸爸托人搭我介绍了对象。谈了一年多个恋爱，外滩情人墙也去过了。乃末阿拉商量定于1976年个国庆节，辣海阿拉屋里向举办弄堂婚礼。

　　因为男方亲眷少，喜酒辣辣阿拉屋里向操办。乃末请厨师、拟菜单、邀亲朋好友侪是阿拉爷娘包办了。不过好事多磨，搿年正好碰着毛主席逝世，追悼会呒没开个前头，啥人也不敢办喜事，乃末婚期改辣毛主席追悼会后个1976年10月28日。我记得老清爽，搿日大雨落得一天世界，爸爸讲迭个叫“有财有势（水）”。我搭男方屋里就差两站路。要显示女家对嫁女个重视，爸爸一定要男方开轿车来接我。我搿日着双新皮鞋，是淌水走进轿车个。我着个是特特为从南京路“朋街”买来个套装，上身是全毛西装领两用衫，下身西装裤。店家衣裳做工好，样板也好！男方着个是蓝卡中山装，下身是深蓝华达呢西装裤。因为双方屋里离得忒近，车子一发动就能到，乃末只好硬劲过形式，伊带牢我绕牢八埭头四周兜一圈再到伊拉屋里。拜了婆婆吃了红枣桂圆汤，轿车再开回到阿拉屋里。当时迭能兜一圈，车费也只有2元5角。

　　雨终于垃拉夜快头停了，迭个辰光阿拉整条小弄堂邪气闹猛，因为屋里地方小，大菜师傅基本浪拿厨房摆辣弄堂里了。弄堂个一只角搭起了雨棚，支起了大镬子，点起了100支光个灯泡，大木脚桶里侪浸个汏好个物事，鱼肉鸡鸭侪是邻舍帮忙个，隔壁邻舍还拿钢种镬子铁锅子碗盆筷勺圆桌凳子统统借拨阿拉，忙得厨师一面勿停个斩啊杀啊切啊！一边吆喝大家拿盆来拿碗来。菜是准备了好几天，只记得青鱼养辣八仙桌台底下，鸡鸭乡下带来好几只。大镬子里飘着诱人个香味，走油蹄髈鸡鸭辣辣里向勿停个笃。左右隔壁邻居家侪摆好了一两桌圆台面，桌子浪摆了光明啤酒、七宝大曲跟黄酒，牡丹、大前门香烟。碗搭筷也整齐摆好，只等喜酒开始！人情世态辣辣弄堂迭个地方是再生动也呒没了。邻舍之间勿分你我，侪成了一家门。我个爷娘只晓得勿停个忙，对伊拉来讲，是悲喜交加。养了二十来年个囡儿终于长大成家了，勿舍得呀。喜酒开始，先十只冷盘上场，然后一道道热菜陆续上桌，最后是四大菜全部上来，十冷盆六热炒两美点，一共6桌。气氛达到高潮，呒没了先前个客套跟拘束，大声猜拳喝酒，碰杯豪饮。新娘敬酒点烟，是高峰辰光。

　　迭能闹猛个气氛现在再也勿会有了，老早弄堂旧貌，只好凭记忆跟记载回忆。我还保留了当时喜酒菜单，平均每桌成本28元。来吃喜酒个人送礼有送8元有送6元，记得我哥哥送得顶多，是20元。菜单浪炒猪肝猪心侪是上台面个菜，油里炸个面包土司（好像沾上肉糜酱再炸）也算是热菜，当时如果辣饭店里办喜酒好像搭迭个价钿也差勿多吧。自家烧量大，比如炒鳝丝，每桌足足一斤。珍珍喜酒上个“炒鳝丝”，要晓得埃个辰光菜场里几乎买勿到鳝丝，绝对是上档次个菜。当时阿拉八埭头沪东菜场还买勿到，要到三角地菜场、宁海东路菜场、巨鹿路菜场迭能个大菜场再买得到。搿个样样凭票个年代，准备喜酒小菜，绝对是要有眼本事噢！记得厨师是个胖胖个宁波老头，讲话声音咣咣响。酒办好后还要送厨师香烟、老酒、鸡鸭咾啥。想想自家个恋爱与婚姻，呒没爱得死去活来，也呒没吵得勿可开交，就迭能平平淡淡一道走过来，共同经历了艰辛搭磨难，感受了幸福告快乐，现在阿拉做爷爷奶奶了，难道还勿够“爱”伐？