我小个辰光，辣拉伲浦东乡下头，会得白相一种活动——落苏灯。 

　　落苏灯具体是阿里一天白相个，记勿得了，只晓得白相好落苏灯，再过个几天暑假就要过脱开学了。所以伊个辰光个夜头已经是蛮风凉了。 

　　到伊个一天夜里向大概七点钟左右，天刚刚黑下来，隔壁邻居基本浪是年纪较大个老人开始出来喊了：插香啦！勿晓得伊拉哪能拿搿个日脚记来介牢个，像阿拉姆妈搿辈有辰光也要忘记脱个。乃末大家就到屋里向拿出来一把香，辣液化气灶头高头拿伊拉根根点亮。辣阿拉屋里，搿辰光我就冲过去：我来，我来！小手里向捏了满满一把香，沿了自家房子四周个壁角落头里拿香一根一根插下去，有辰光香灰落下来跌了手高头，烫是烫得来……不过，插好后看到四周隔壁邻居侪是一根根香头个点点红光辣黑色夜幕中熠熠闪闪，宛如仙境一样，开心是开心得来……听大人讲，搿天是为了纪念土地公公。 

　　挨下来，小人个节目开始哉。大人开始帮小人做落苏灯：选一根好看点个芦竹棒头，一头系一根绳子，绳子埃面一头系了落苏高头，落苏要捡胖胖直直个，勿要细细歪歪个，系好后，辣拉落苏身高头插一支支点好个香，浑身全插满。小人拿棒头拎了手里向出门来……一歇歇功夫，只看到搿个小朋友出来了，伊个小朋友也出来了，搿面出来只落苏灯，伊面又出来只，周围个小朋友侪出来了，开心唻！ 

　　落苏灯光提了手里向是呒啥好白相个，但是侬只要一晃，香头浪一点点个红光马上变成一条条橙红色个亮线，落苏高头个交关香一道晃动，就像一只火球，真个老好看个！落苏灯晃了轻点有轻点个样子，重点有重点个样子，横晃有横晃个样子，竖晃有竖晃个样子……想让伊变成啥样子，侪辣侬手里，就像老早仔看万花筒一样，出其不意个拨你惊喜。 

　　落苏灯到底是从啥辰光开始个？插香到底是勿是纪念土地公公？搿天仔到底是啥日脚？侪勿重要了，但是落苏灯拨我个童年带来了一份美好个回忆。现在搿个活动越来越少了，因为伊个年代搿老人越来越少，大人有辰光也记勿起来了。