网络浪用个一句热门闲话：“打酱油去！”迭个是专为嘲讽有人办事无功而返，空忙一阵个。上海人去买酱油勿用“打”字，上海人讲“拷”，拷酱油去。旧上海滩浪专门卖油、盐、酱、醋个店家称为酱园。酱园多半以青砖粉墙来装修个。粉墙都砌得特别高挑，至少也有两层楼面迭样高。粉墙还刷得雪白雪白，上书一个起码丈二大小个“酱”字。酱园个店门是黑漆大门。店面个招牌与大个“酱”字一比，小多了。酱园勿开设一窗一户。白墙、黑字、黑门，显得分外森严。与酱园个装饰相仿个门面只是当铺了。当铺个粉墙上书一个硕大个“当”字，也是一扇大黑门，也是勿开窗户，戒备森严。当铺如此装备，是防范强盗歹徒入店掠金夺银，打家劫舍，恨勿得拿店家修成一个碉堡，可以领会。但酱园又何必搿能介呢？强盗们来抢盐、抢酱油、抢米醋？有点弄勿懂。以后有机会去请教民俗专家。

　　走进酱园，店堂内必有一曲尺形柜台，用黑漆油过，气派十足。柜台浪钵盆一字排开，盛着酱菜、酱瓜、乳腐供人挑选。店堂里侧是数十口大缸，装着上好酱油。还有垒着个麻袋，应该是或海盐或岩盐。店堂里个空气是湿答答、咸咪咪、酸稀稀个。就像医院里个酒精味道一样，特别个气味会让人肃然起敬个。

　　40后、50后个爷叔、伯伯辣小辰光侪被屋里向大人派过生活，到酱园里去拷点酱油，买点酱菜、乳腐个。伊个辰光，呒没啥个瓶装酱油、瓶装米醋。要拷酱油、米醋，自备家生，自家带好空瓶。酱园里还有零吊个老酒可以拷。上海人烧小菜，习惯放点绍兴酒。欢喜扳扳老酒个就会常常去跑跑酱园。除了绍兴酒，酱园里别个酒也勿少。白酒、五加皮、绿豆烧、葡萄酒侪可以零买。当瓶装啤酒、零拷生啤后来上市后，搿笔大生意拨烟糖公司抢过去了。而属于粮油公司个酱园直到以后经营开放、买卖市场化之后才做起零买啤酒个生意。

　　拷豆油、菜油个任务辣伊个辰光属于家庭中个重大工程。买油有限制、买油要凭油票。告咾买油大人是勿放心交拨投五投六个小囡们去完成个。打翻半瓶油、打碎一瓶油是大事体，会弄得一家门一个月里见不到一眼油水。因此拷油、买糖、买盐迭点要凭票供应个生活，屋里向搿当家人会亲自出动。油、糖、盐，一两五钱个份量侪是推扳勿起个。

　　当年个迭点票证如今都变成文物古董了。辣文物市场浪有个又身价百倍了。可惜我个屋里向辣当年一张都勿舍得浪费，全部出送了。一点不懊恼。反正今朝个生活更有滋味了。