威海路浪个张园又叫张家花园，辣上海滩是很有名气个。

　　但是大家可能勿晓得，上世纪40年代个辰光，从张园曾经走出过一支排球队。其中有后来中国排坛很著名个运动员钱家祥。我个爸爸呢也是搿支球队中个一员。

　　张园是大弄堂里套小弄堂。大个弄堂可以并排开两部汽车，所以有了打排球个场地。小弄堂里呢是石库门房子，供住户进进出出。当时伊拉就辣華嚴里个红砖墙上面装了两只钩子，排球网是自己用绳子编个。

　　伊拉都是大学生，呒没啥钞票，住辣6号里个祝家就出铜钿帮伊拉买排球、球衣。只要伊拉一开打，全弄堂里个人侪会出来看球，相当热闹。

　　听我爸爸讲，伊拉埃个辰光经常出去比赛，还脱俄罗斯青年队打过一场比赛，打败了白人哦，当时个报纸浪还登过搿则消息，相当光荣。我爸爸还拿搿份报纸一直保留辣海，我也看到过，可惜辣“文化大革命”中遗失了。

　　从张园搿支排球队当中走出来个钱家祥，1951年进入中国男子排球队，后来是体育局排球处处长。上世纪80年代出任中国排球协会秘书长，创建了漳州、郴州排球基地，为中国女排冲出亚洲并夺得五连冠做出了贡献。伊过世后，还把自己一半个骨灰安葬了漳州排球基地。

　　五连冠之后，当年张园弄堂排球队搿眼球员都从世界各地飞回张园来，大家庆祝五连冠、为五连冠自豪，同时也回忆起伊拉当时辣弄堂里打球个日脚，搿个也算是一种致青春吧。

　　1981年，钱家祥特地带仔当时男排个主力汪嘉伟到张园来看当年自己辣弄堂里打球个地方，还特别让汪嘉伟看了红砖墙浪两只挂排球网个钩子。搿两只钩子倒一直保存到2000年，只是后来修墙，被弄呒没脱了。

　　据说汪嘉伟个儿子是学导演个，有心想拍一部关于伊父亲排球生涯个纪录片。我真希望伊个儿子能到张园来看看，记录下排球前辈曾经打球个地方。

　　（本文选自新民晚报·新民网出品微信“侬好上海”，微信号：helloshanghai2013。传播上海文化，服务上海市民。大城小事，记得第一辰光微信“上海侬好”哦！参与互动，会有惊喜等着侬！)