日脚过得绷绷紧、紧绷绷，迭样子个闲话，辣上个世纪五、六十年代，辣交关生活必需品侪要凭各种各样票证供应个年代里，辣上海个街头巷尾经常能听到，用来形容生活个艰难，生活个勿容易。

　　伊个辰光个米、面粮食等要凭票供应，鱼、肉要凭票供应，就是白糖、糕点也要凭票供应，还有买布头做衣裳或被单要布票，还有脚踏车、缝纫机票子咾啥，更勿是家家侪弄得到个稀缺票证，日脚过得紧绷绷，侬就是有钞票也买勿到侬需要个，阿里搭像今朝个市场、超市，掏钞票就能随便买到金针、木耳等当年个“年货”。伊辰光要过年时，每家每户才能凭户口本、凭票，买到一些来应节。当然，搿还勿是日脚过得紧绷绷个主要所指，主要个是粮票紧张，当时成人每月个粮票也就辣三十斤上落，如果侬上半个月呒没计划好，吃多了点，乃末下半个月就要过紧绷绷个日脚了，否则撑勿到下个号头，侬自家、侬屋里向个人肚皮就只能唱空城计了。当然，日脚过得紧绷绷，更加主要所指个还是过日脚人民币忒少，生活勿富裕、生活拮据个窘境。伊辰光虽然物价很低，青菜、萝卜只有二三分钱一斤、黄豆芽绿豆芽六七分钱一斤，带鱼小一点个才一毛两三分钱一斤、大个亦不过一毛五六分钱一斤，黄鱼个价格与带鱼也差不多，籼米才一毛两三分钱一斤，好个大米一毛七分一斤，面粉亦是一毛七分钱一斤。但是，各家庭个收入并勿多，有一个月五六十个、七八十个，少有超过百元大关个。当时一般家庭个人口又多，少则四五人，多则六七人，甚至更多，要维持日常生活还真个要精打细算、合理安排才来三。当家庭中要添置一些较贵个用品、有人生病或发生其他个勿大勿小个变故时，迭个辰光生活就会窘迫起来，离下次发工资个日脚如果还有老多时日，葛末就要过紧绷绷个日脚了，要一直绷到下次发工资个辰光，真是勿容易，真个就是日脚过得紧绷绷、绷绷紧。

　　讲到“紧绷绷”搿个词，就让人想到当年走街串巷吆喝“阿有棕绷、藤绷修？”个师傅们为人家修理棕绷床、藤绷床个事情来，棕绷床、藤绷床睏长远了，中间会凹下去，凹得深了，就得绷绷紧再睡了。现在，大家侪睡席梦思了，睏棕绷床、藤绷床个人越来越少了，经过二、三十年个改革、开放，老百姓个生活得到了很大很大个提高与改善，各种各样个票证早已取消，成了历史，大家个收入工资成倍成倍个增长，不再为日常个油盐酱醋米面而发愁，搿个紧绷绷过日脚个说法已越来越少，正辣海淡出阿拉个视线，但搿个毫无疑问是当年窘迫生活写照个经典语言，既生动、形象，又实在、朴实，辣上海闲话中留下了深刻个历史影响。