男人中个谢顶（俗称秃顶），有几种状况，一种是全秃，上海人戏称为“电灯泡”，一种是头顶个中间秃，周边头发还呒没谢，上海人戏称为“荷包蛋”，还有一种就是本文要说个“横搭襻”了，搿种秃发个人，其实搭“荷包蛋”属同类型，只不过伊拉拿鬓边最后个头发留长，并拿伊拉横摆辣头顶，用作遮盖脱部分个秃顶，因为模样类似“搭襻”，上海人就戏称为“横搭襻”。

　　“襻”字是衣字旁，最早应该是衣服个配件，中式衣服多用盘纽，分纽子、纽襻两部分，纽子扣进纽襻，衣襟个位置就被固定了。

　　后来，纽襻被放长，用到别个地方，就成为“搭襻”，老早女同胞穿个“搭襻”布鞋就是用个“横搭襻”，比较典型。仔细想想，被称为“横搭襻”个秃顶，伊个一缕长发，的确脱“搭襻”鞋个“横搭襻”邪气相似。

　　虽说搿是上海人一种幽默，一种揶揄，但我从“横搭襻”发型上，看到个却是一种执着告坚持，尽管秃发，“无可奈何花落去”，但“横搭襻”们并勿服输，勿放弃，依然将部分仅存个头发尽可能个留长，抓住“青春的尾巴”，坚持自己对美个追求，所以，每每见到搿种“横搭襻”，我辣好笑之余，反倒有一种肃然起敬个感觉。我相信，伊拉一定是有坚定信念个人，勿轻言放弃个人。

　　当然，也有比较能面对现实个人，干脆剃个光头，很干净，也很男人，其实，勿同个人生阶段，是可以也应该有勿同个活法个，衰老是勿可抗拒个自然规律，脱发，白发，也是无奈个结局，顺应自然规律，选择新个活法，也勿失为明智个态度。对待脱发个态度，也体现伊对人生个态度。我欣赏“横搭襻”个坚持，但同样欣赏“光头”个明智，世界本来就应该是丰富多彩个嘛！