上海人要干净，真个要干净。上海人家每一天个家务生活里，揩揩台子、凳子，扫扫地、拖拖地板是必修课程。就是玻璃门窗、灯罩灯箱揩起来复杂一点，但是也决勿会马虎了事。汏衣裳、被单、晒被头、衣裳也是上海人所爱。太阳一出，晒台浪、阳台里就一定会挂满“万国国旗”。现在到每家人家去查卫生个节目早已取消了。家家卫生、人人清爽。“侬屋里向收作得三青四绿，叫阿拉真是勿作兴踏进去！”“张家好婆要有九十岁了，伊出门还是穿得三青四绿，清清爽爽！”上海闲话里个三青四绿是勿是从形容风景个山青水绿引申过来个？要请教吴语专家了。三青四绿，整齐清洁，一尘勿染。

　　上海人要干净。旧上海个十里洋场是脏、乱、差。只要去翻翻叶浅予、张乐平当时画个漫画小书就可以读到伊个辰光上海滩个龌龊了。马路浪垃圾遍地。山墙浪、电线木杆浪贴足大小广告、寻人寻物告示。小马路、弄堂口黑字涂壁：“严禁乱倒垃圾！”“不准大小便！”搿样子个标语常常变成指路牌、告示板，引得一点勿识相个路人就此方便了。龌龊，龌里龌龊，上海人以此来指肮脏。“写字间弄得倒蛮干净。卫生间里是龌龊八腊，吓煞人了！”新上海打扫龌龊，干净过。以后一度又泛滥脏乱差。当下方是上海最为清爽个辰光。路也修平修齐了。房也涂新涂亮了。还拉出了几百条新马路，竖起了几千幢新大楼。上海滩、黄浦江、苏州河变得三青四绿。好看。经看。

　　上海闲话里还有一个形容又乱又脏个闲话，叫邋遢。邋遢也可以算是洋泾浜闲话，为英语litter个译音。邋遢指脏乱，也指人个勿修边幅。“帽子戴戴正，衣裳拉拉挺，鞋子拔拔上。唉，像侬搿样子邋里邋遢，坍足做姆妈个台！”与邋遢意思相近个，还有添拖和乌苏。添拖，勿干勿净、勿整勿齐。还可以指办事拖泥带水、勿爽快勿干净。写成添拖是词典里所规范个，更接近个可以写为T拖。用英文字母T来谐音。当然，如此要拨专家吃排头个。乌苏，肮脏而且杂乱，叫人看得心烦意乱、勿爽勿快。添拖和乌苏应该算是上了年纪个上海闲话了。会听、会讲、会用个上海人至少接近与超过领取老人卡个岁数哉。任何语言，都会新生与衰老个。交关词语与闲话只活辣大词典里了。