楼浪阿根，年纪奔六，心态蛮年轻。日多一只手机捏垃手里，上微博，发微信，打游戏，看视频，朋友圈群聊，好段子转发，忙得来做事体勿晓得早晏，走路勿晓得靠边。搿日脚，阿根像煞是接着一笔大业务，心境好，喉咙胖，捏仔电话手舞足蹈哇啦哇啦，穿马路勿当心，脚绊垃上街沿，一跤跌得杀杀膊膊，手机掼到老远。过路人要搀伊起来。阿根敲脱伊拉个手，指指阴沟洞旁边个手机，叫人家快点拾起来。埃个腔势赛过电影里看着个模子：勿要管我，快，救手机要紧！

　　阿根回到屋里，睏垃床浪养伤。手好动，眼睛好看，勿妨碍发微信。伊拿脚浪个两只乌青块拍下来发到朋友圈浪，回复交关，侪是安慰话。阿根拿手机拨家主婆看：“一歇歇大家侪晓得了。”阿根个家主婆叫芳芳，伊讲：“阿根，还算好，骨头呒没断。要当心哉，走路安全有规定个，穿马路勿好打电话看手机。”阿根勿开心了：“迭搭是屋里噢，勿是侬个工作岗位。”

　　芳芳是交通协管员，垃小区对过路口执勤。覅看伊人瘦小，有人闯红灯，伊一声叫鞭，大大小小侪退转来。偏偏自家老公阿根，穿马路看手机，一趟趟讲，侪白白里。原本想借个因头汏汏阿根脑子，结果阿根还是勿领盆。

　　阿根搿跤呒没伤筋动骨，好起来快，又捏仔手机垃路浪虎头虎冲。今朝早浪，阿根开电动车出去，照样一只手挡龙头一只手看微信。到路口，勿看红绿灯就朝对马路开。呒没想着一部卡车转弯，从旁边截过去。阿根听见汽车马达声，鹤起头一看，豪燥刹车，手里有手机，捏勿紧刹车，撞上去。过路人吓煞，要闯穷祸哉。正垃迭个辰光，一个人窜上去，捏牢电动车龙头拼命一扳，“砰”，电动车翻倒，阿根翻倒，冲上去个人掼出一条横马路。卡车贴牢电动车擦过。阿根掼脱手机，从地浪爬起来，跌煞冲煞过去拿伊个人扶起来。“啊，芳芳，是侬？”阿根做梦也想勿到救命恩人是自家个家主婆。

　　吃过夜饭，阿根从衣袋里摸出手机。屏幕暗脱了，揿揿按钮，呒没反应，重新开机，开勿开，是掼坏脱了。想想手机害人，勿白相了。囡儿讲：“阿爸，手机勿是坏物事，看侬哪能用法。明朝我去搭侬买一只土豪金个iphone6。”