小孙孙进了幼儿园，回家就知道玩“石头剪刀布”了。我对伊讲：“阿拉来白相猜东猜。”伊勿懂，勿晓得搿是什么玩意儿。近年来，幼儿园、中小学侪讲普通话，小囡已经勿会讲上海闲话了，严重个甚至听勿懂上海闲话。猜东猜，就是北方人讲个“石头剪刀布”，两人对决雌雄。操作时两人一道念口令“猜东里（个）猜”。口令念到第二个“猜”字，两人同时出手。口令中“里个”两字呒没实在意思，只是让口令延长，让人有更长个思考搭准备时间，充分体现了上海闲话人性化个特点。

　　上海个猜东猜勿仅是两人对决个博弈形式，而且衍化为室外个游戏。猜东猜时勿是出手示意，而用下肢个姿态。“猜东里（个）猜”念到第二个“猜”字，两人跳跃，以落地时两只脚个位置示意：两脚并拢立正姿势为“石头”，两脚左右分开站立为“布”，两脚前后为“剪刀”。迭种猜东猜往往勿是为了对决雌雄，而是一款室外游戏。两人连续十几次，每胜一次得1分，最后积分几比几，分高者为胜。小囡辣拉猜东猜个辰光，勿停个跳跃，嘴巴浪还要念口令脱比分，一局下来运动量勿比跳绳推扳。

　　两个人对决用猜东猜，如果三五个人要决出一个人出局（或者领头），上海人就用乒令乓冷气个办法。三五个人围成一圈，手侪放辣背后闶起来，一道念口令“乒令乓冷气”，一道出手，示手背或手掌。勿管手背还是手掌，只要啥人是单吊，伊就出局。如果呒没单吊，就重复，直到有人出局。猜东猜与石头剪刀布虽然口令勿同，但形式是一样个，而乒令乓冷气呒没相应个游戏，所以特为加一笔。