骂人个上海闲话当中，骂得最多、听到最多个是瘪三和赤佬了。瘪三，指叫花子，指乞丐。瘪三个出典是英文begsir个音译，可以算是上海滩浪英泾浜用闲话里存活率奇高个单词了。赤佬，也写成为出老个，搿个是指鬼，阴曹地府里个小鬼。出老后来变为赤佬，我猜是当时个文人只是为了看起来文绉绉一点，并且出老夹辣一长串文字当中也容易被混淆为一个动词。单纯直白个出老最终是弄勿过赤佬，记载上海风情个书籍里赤佬还是牢牢个占据了主要座位。辣上海人平平常常个生活当中，瘪三和赤佬慢慢变成了大家个口头语。有个朋友出口“瘪三”、闭口“赤佬”勿是辣骂啥个人，只是一种感叹用语。有辰光表示恨，有辰光表达爱，有辰光传达惊奇，有辰光散发恐惧，有辰光显示愉悦。懂了一点点上海闲话个外地朋友千万勿要发生误会，有上海人叽哩咕噜个骂瘪三和赤佬个辰光，是呒没丝毫个恶意个。伊骂伊个，侬走侬个，勿搭介个。

　　上海闲话里个“小”是有相当魔力个。瘪三变成小瘪三，赤佬变成小赤佬，辣绝大部分个场合下是大人对小人个一种爱称。搿个与北京人称呼小孩、小伙为小鬼个情形差勿多。“小瘪三蛮聪明个，语数外通通考满分，来三!”“小赤佬又野出去踢皮球了，将来送伊到崇明去，培养伊去做范志毅!”上海个本地闲话当中，倌材、浮尸是可以算为骂山门个闲话个。但是老上海人辣前头加了个“小”字，小倌材和小浮尸也变得亲热起来。还有交交关关个贬意词一冠以“小”字，就中和了，甚至还摇身一变成为了褒义词了。滑头，油腔滑调个家伙。小滑头变为昵称了，是指调皮捣蛋、会耍嘴皮子个小鬼头了。花痴，是精神病个一种。小花痴变为欢喜打扮得过份过头个小姑娘了。十三点，也指专指神经兮兮个、举止言语过火个脚色。小十三也变化了，只指有点疯疯颠颠、坐立勿安个男小囡、女小囡了。百搭，扑克牌、麻将牌当中可以任意搭配个牌，上海闲话里形容善于结交各式人等个社会达人。小百搭是有点称赞意思了，小朋友、小青年长于社会工作个，与周围人群合得快合得拢个，送伊一个“小百搭”个雅号吧。可以举例说明个“小”字头，上海闲话真还勿勿少少，小把戏、小妖怪、小老茄、小老卵……添加了“小”，交关上海闲话变味道了。由苦转甜，由恨到爱，由触气变可爱，是？