屋里向藏书虽然讲勿能算多，书橱搭仔书架也有好几只，量量面积有几个平方，迭歇房价金贵，算下来要靠念万，远远超过书个价值，尽管有一眼民国版个线装老书，也是资勿抵价。不过现在即便互联网盛行，可以勒网浪手机浪看东西，书本个作用已经勿大，但总还是勿及手持一卷，清茶一盏来得潇洒闲适，所以一直舍勿得拿书清理厾脱，腾出一两个平方出来，反而有辰光还要到福州路买新书淘旧书，文庙书市也是时勿时光顾个地方，当作闲云野鹤生活个一种乐趣。

　　讲起老早南市区个文庙，的的刮刮有眼来头，伊是古代上海最高个教育行政机构搭仔祭祀孔子个场化，有大成殿、崇圣殿、名宦祠、乡贤祠、明伦堂、儒学署搭仔有名个魁星阁等等古建筑。后来又改建为文庙公园，增添了假山、池塘、茅亭搭仔动物标本馆等设施。小辰光我经常去白相，因为勿要门票。再后来又辟建图书馆，更是有空就去坐坐，记得我对中国书画有兴趣，就是因为勒辣文庙图书馆浏览了交关个山水花鸟书法画册，熟悉了交关大书画家个名头。

　　文庙后来个变迁萧条就勿去讲伊了，改建成群众文化馆是“文革”后个事体，勿多辰光又歇搁了。伊最兴旺热闹个辰光是开辟了文庙星期书市，可以讲闻名国内外，庙里庙外书店书摊林立，旧报刊杂志、书画典籍、文玩摆件，应有尽有，是淘友们个天堂，真有点“淘宝终日不须归”个快活。当然我有辰光也去领领市面，淘过一眼杂志旧书。前两年文庙书市整顿，新个书报杂志销售迁到大宁绿地旁边，文庙就剩下旧书摊了（也包括一些旧报刊杂志），规模大勿如前，庙门前个零星旧书地摊近来也一扫而空，有点像白居易《琵琶行》中个“门前冷落车马稀”个味道。不过闲话讲转来，文庙书市还是淘书人个乐园，譬如像我迭能个爱书一族。

　　前段辰光一个礼拜天，我勒辣福州路旧书店兜了一圈，并无所得，便安步当车来到文庙，正是下半日四点钟，冬日个夕阳照勒辣魁星阁浪，高大个树木浪归鸟啁啾，真有眼诗情画意。走进文庙，大殿庭院书摊书铺挤挤挨挨、琳琅满目，书主侪已准备收摊，但淘书人还是舍勿得离开。有个摊主还勿停叫喊：“十块一本、五块一本，噢迭个，两块一本，合【gak】算个。”我俯身拣觅，看到一本《桥牌做庄测验》，五块洋钿；一本上世纪1952年出版，1978年再版个《杜甫诗选》，两块钱；另外又翻到一本巴尔扎克个《夏倍上校》，傅雷翻译，1954年版，也是两块。年轻辰光读过交关巴氏小说，啥个《高老头》《搅水女人》《欧也妮·葛朗台》《猫球商店》《舒昂党人》《于絮尔·弥罗埃》等等，屋里也有勿成套个巴氏全集，迭本《夏倍上校》正好拾遗补缺，虽勿是“如获珠宝”，但也敝帚自珍。尤其令人感到欣慰个是，有很多青年人（看上去像高校学生），也勒海淘书，告摊主讨价还价，迭个一幕让我迭个爱书人觉得后继有人。

　　不过耳朵边刮着一句，说文庙星期书市又将整顿，勿晓得是否属实，叫淘书人心酸，禁勿住心里打一个问号：今后文庙还能淘旧书？