现在一到放假大人侪要动脑筋小人哪能安排。阿拉勒拉上世纪七十年代上小学，寒暑假辰光侪要组织开小小班，一般四五个人一组，最多六个人，小小班侪是自由组合个，不过，名单还是要拨老师晓得。老师还会定期来检查。阿拉是五个小姑娘组织一个小小班，侪是住了附近弄堂里个。阿拉就隔天开一次，挑选一家屋里稍微大一眼个，假期个功课侪勒拉小小班里做。出去开小小班，屋里大人侪老放心个。做好功课阿拉还唱唱歌，还编织绒线，有个会用线勾勾包，勾出老好看个花样。阿拉相互学来学去，老有劲个。大家还要到弄堂里去跳跳橡皮筋，踢踢毽子，白相了老开心。

　　老师对阿拉女同学个小小班比较放心，所以勿大来检查，阿拉就老自由个，做做功课茄茄山河，有辰光讲讲自家阿爸姆妈。

　　一趟一个女同学讲，阿拉阿爸欢喜我，搭我买个侪是带橡皮头铅笔，阿哥就呒没。几个女同学联想到自家个阿爸，侪讲对个对个，阿爸欢喜阿拉，姆妈欢喜阿哥阿弟。阿拉隔壁弄堂里一个女同学闷声勿响，阿拉大家呒没看山色，侪夸自家阿爸好，例子举个勿停，另外一个讲伊拉阿爸还偷偷瞒过伊拉姆妈拨伊零用钿唻，隔壁弄堂里女同学哭起来了，阿拉大家一记头闷脱了，看牢伊。一个人讲哪能介滑稽啦，阿拉开心侬还要哭。伊讲，老开心个，伊阿爸三年前生病走了，当时断气了眼睛还勿闭，伊姆妈叫伊拉阿爸闭还勿肯闭，伊就跟伊阿爸讲，伊会听姆妈闲话个，会搭姆妈一道照顾好阿弟阿妹个，伊拉阿爸终于闭上了眼睛。伊讲到搿搭哭了老伤心，一记头阿拉一个个侪哭了。

　　搿天巧了，老师正好来检查，看到阿拉侪勒拉哭，问阿拉做啥勿开心啦？阿拉一个个马上擦干眼泪，假装呒没发生过啥事体一样，老师还是看出来了。老师讲，同学之间侪要相互帮助相互爱护哦。后来，阿拉小小班里个同学，经常拿自家屋里好吃东西来拨伊吃，有个还送伊好看铅笔搭仔橡皮，勿再勒小小班里夸自家阿爸，小小班里同学要好得像自家个亲姐妹。