有人讲自从有了数码相机，好像人人侪成了摄影师。只要拍摄对象好，揿记快门一张好照片就出来了。假使再弄点“秀秀”，好作品就呒啥稀奇了。确实，随着科技进步，设备是可以产生相当灵光个色彩，不过闲话讲转来，取景、构图还是要靠眼光，尤其是对角度、透视个分析，光线、明暗个理解还是人讲了算。

　　迭个就让我想起自家年轻辰光拍照片个种种乐趣，每趟揿快门前总归要对光影、视角反复推敲，勿像现在，笃定“咔嚓”，马上看到效果，勿灵删脱重来，一天就好拍个几百张。其实迭能介白相照片，乐趣就呒啥啥了。

　　老底仔白相照片勿仅是拍，还非得自家冲洗印放，迭个才叫享受。

　　白相照片个总有只圈子，设备辣拉圈子里凑，尤其是庞大个放大机铁架子肯定是“合用”个，合用个通常还有上光机、大尺寸个搪瓷平底盘、切纸刀等，尤其是花边切刀。像红白灯泡、显影盒等一般侪自备，而镜头我是将582型相机个镜头拆下来。最值得一提个是，也只有辣拉条件老推扳个情况下，才会产生迭种乐趣。为了节约铜钿，老早胶卷是买简装个，要自家伸进被头筒里摸黑装进暗盒，放大纸是买散装个，绒面、光面、勿同反差个，几张几张买。显影粉买小包装，定影液难板还通过熟人从“冠龙”后门让人灌一大瓶用过。

　　最后就是暗房了，我个暗房辣拉阁楼上，夜里，等屋里向个人侪睏了，我就拿阁楼个栏杆蒙上毯子，堵牢所有个光线，就只等我“展示”本事了。放大机早早就安装好了，拿红灯打开，地方再小也要拿盆盆罐罐一一弄舒齐。拿胶片卷到冲洗盒轴头上，倒进显影水，拧紧盖头，将盖顶上个轴头轻轻叫旋转，几分钟后，倒出显影水，灌进定影液，等脱一歇，再小心翼翼个打开显影盒，就像打开魔盒一样，当我拿起湿溚溚个胶卷朝红灯上照个辰光，伊种紧张、兴奋，是青少年时才会有个懵懵懂懂个成就感，根本顾勿上闷得汗流浃背，有辰光还会衰瘏得哈欠连天，不过还有啥抵得上迭种得意呢！

　　整个过程中，最开心个是当浸泡辣拉显影液里个白色相纸上开始隐隐约约出现一点点影像个辰光，伊种兴奋会跟牢影像个慢慢叫出现而一道升温，一点声音也呒没个暗房里只听得见心跳……

　　辣拉我个旧相册里，到现在还珍藏有阁楼上个勿少作品，里向勿光光是我搭当时朋友们一只只幼稚个面孔，也勿光是已经消失个弄堂、讲勿出名堂个花园，恰恰就是孵辣阁楼里数勿清爽个深更半夜，红灯下个手忙脚乱，半夜里突然打翻了一只瓶罐，吵醒了睏着个大人……