起一个好名字，迭个倒是一门艺术，所以讲小囡养出来后，大人起名字个辰光，屋里向老人欢喜请老先生算一算个，讲起来名字只是一个人个代号，交关人认为，人个名字里包含了人一生命运个交关信息。

　　记得以前有一个牌子个汽车垃拉上海常常出事体，交关人就讲是迭个汽车名字呒没起好，侬想“昌河”读起来像煞读“闯祸”，天天开“闯祸”车哪能勿出事体。人个名字起得好，喊起来就好听，起了勿好就别扭，弄了勿好就是一个绰号，所以讲随便侬是人还是物，一定要晓得起名辰光哪能避开勿利个谐音，要起一个朗朗上口有彩头个名字，如果勿了解一个地方个闲话个谐音可能就会让人误会个。可口可乐，如果是苦口苦乐，啥人会得去吃？现在阿拉晓得个奔驰汽车，呒没进上海个辰光垃拉香港台湾翻译起个名叫平治，到上海如果叫平治，上海闲话读起来谐音有眼像“瓶子”“平时”，所以到上海请上海人个翻译起了叫“奔驰”，奔起来快个意思叫得响亮。还有一个刚刚进上海个大众起名叫桑塔纳，勿小心读起来“伤脱了”，到现在交关驾驶员欢喜第一代个桑塔纳，因为伊碰碰磕磕“伤脱了”还勿怕，有眼“轻伤勿下火线”个魄力。

　　现在学讲上海话个人多起来了。特别是新民晚报上海闲话版出来之后，大家交流起来老扎劲个。讲到起名字大家侬一句、我一句讲了头头是道，葛末上海闲话当中啥名字勿大好听，容易让人产生联想呢。比如讲“梅斌”，用普通话叫起来呒没啥，拿上海话读，乃末另有一层意思了，“梅斌”读起来像“煤饼”，是老里八早针对勿良妇女个称呼，“吴卓佩”用上海闲话读起来像“下流胚”。“洪韶玉”像“红烧肉”了，“柴武”“柴思思”迭个上海人侪晓得，就是上厕所。还有“马彤”（马桶）、“杨姗虞”（洋山芋）、杨威（阳痿）、陈金萍（神经病）、聂思萍（热水瓶）咾啥。其实有辰光普通话读出来意思倒呒啥好笑，如果拿上海闲话来讲，乃末好笑哉。上海人起名还要考虑普通话读音，更多是考虑上海人讲闲话个读音，只要勿是存心伤害，拿简单个名字品牌弄出点噱头，就是好白相而已。