听我叔公讲，阿拉是的的括括个老上海，有啥证据？垃拉阿拉原驻地杨浦区北沙港地区（现曲阳新村）有座“阁老殿”就是明证。大家晓得，“阁老”是指明代称大学士及翰林学士入阁办事个人，迭个是明清辰光老百姓对入阁官员一种通俗又勿失尊敬个称呼。“阁老殿”垃拉老早清嘉庆《松江府志》、同治《上海县志》，现在个《杨浦区志》侪有记载，里向讲：阁老殿又称全公祠，始建于明洪武后期（1384～1398年）。原系祀奉全思诚。洪武十六年以耆儒授文华殿大学士兼左中允。阁老殿主殿单檐歇山，高屋宽敞，两厢偏殿，中间庭院，前有戏台，布局错落有致。“八一三”事变，祠部分毁于侵华日军个炮火。民国36年，住持尼悟心募建楼房一幢，计房屋19间。1960年，悟心转业，大殿被石棉一厂租用，祠废。

　　上海垃拉公元1291年（元至元二十八年）升格为县，标志着阿拉上海建城开始。这座“阁老殿”，始建于明洪武后期（1384～1398年），扳扳手指头，算下来到现在已有600多年了。“阁老”全思诚，《明史·列传》中称伊为“上海人”，阿拉村庄北沙港中就住着老多阁老全思诚个后人（北沙港以全、朱为两大姓，传说迭个跟当年全思诚做过太子老师有关系）。翻翻老古书，晓得全思诚，字希贤，号文达，从小以文章出名，知识广博。垃拉有些地方“全氏宗祠”内，常常看到迭能一副楹联：“清内经之学，振名士之风。”迭个下联就是指全思诚个道德文章。葛末哪能会得造“阁老殿”呢？全思诚回乡后，勿倚老卖老，跟乡邻相处得老好个，还热心做公益事业。阿拉北沙港和引翔港境内，所有整块石板桥，大都是伊出个铜钿。垃拉桥旁石板上，侪刻有“全文达沫土建造”个字迹。由于当时朝廷粮税征得忒重，伊看拉眼里，急拉心里，后来伊想出一个计策，就是阿拉乡间流传个伊“冒险为民请命”个故事：伊冒死上书称上海闹水灾，请皇帝免征钱粮。皇帝派使者来到上海北沙港，朝东南望去，只看到白浪滔滔，芦苇摇摇，一片汪洋大海。使者回京汇报皇帝后，朝廷准上海北沙港地区免交三年钱粮。乡民感其“为民请命”而死，垃拉北沙港东边为伊造了一座全公祠，尊称为“阁老殿”。阿拉小辰光曾到“阁老殿”白相，记得阁老殿当时信众老多，香火瞎旺。

　　阁老殿作为阿拉上海乡贤最早个纪念性寺庙之一，曾经见证了上海几百年个风雨历程，最后垃拉上海个城市建设中，慢慢湮灭。