老底子上海滩，流传过两句闲话，一句是“挜死空”【oxikong】，还有一句叫“摆挖而司”。

　　“挜空”个本意是“抓瞎”，往往指“白费力，干而无结果，没有实效”，另外还有“勿踏实、勿到位”个延伸义；假使再辣当中嵌一个“死”字，就增添了嘲讽个口气，表示走得绝了。拨垃北方人讲起来就是“不靠谱，白忙活，没治了！”譬如，有趟仔我去小区里晨练，主要想甩甩手、抖抖腿，活络活络筋骨个。结果有人看见我一点呒没章法，垃拉“瞎胡调”【不着边际】，伊问我：侬辣海做啥？我回答伊：辣海“挜死空”呀！引来周围一阵哄笑。搿搭由当事人讲“挜死空”，纯属自我调侃，是一种自嘲，毫无半点自责。不过，后来辣辣社区组织民乐队个辰光，有人“装野胡弹”【不正宗】，讲自家会得拉胡琴，其实水平老搭僵【差劲】，对迭种滥竽充数个老兄，人家也会辣背后讲伊“挜死空”，搿就带有指责伊、看勿起伊个成分了。

　　还有一句“摆挖而司”是勿是英语译音？我呒没考证过。但听上去有眼像“派司”、“拿摩温”、“司必灵锁”咾啥侪是从英文单词个谐音演变过来个。“挖而司”的意思跟“花板”、“滑头”差勿多，“摆挖而司”就是摆花板、耍滑头，说谎吹牛糊弄人……再严重一点，就是灌迷魂汤、设圈套、下陷阱了。现在大家顶顶吓咾咾个“坑蒙拐骗”搭仔“假冒伪劣”咾啥，统统侪逃勿脱“摆挖而司”、拨侬“吃药”【上当】迭点花头经。譬如，上一抢“3·15”消费者权益日个辰光，报纸、电视、网络等交关传媒，一直辣海关照大家提高警惕，勿要上当，迭个搭勿良商家“摆挖而司”、做手脚、卖假货、搞欺骗密切相关个。伊拉拿责任、诚信、规范、公平迭些价值观，一塌刮子掼辣边浪，当伊呒介事；挖空心思“抢”【豪夺】钞票，勿择手段捞“横档”【不义之财】，良心黑得来一天世界，手条子【伎俩】辣得来自家有数。

　　所以，我要拿迭两句闲话摆辣一道来讲。一旦勿良商家对消费者“摆挖而司”了，搿就需要相关职能部门负起责任来，进行监管，千万勿能蹲辣边浪“挜死空”啊！反过来，相关职能部门能切实做到恪尽职守，从严执法，彻底杜绝搿种“挜死空”个事体，葛末还会有啥人敢狗胆包天，一而再、再而三对老百姓“摆挖而司”呢？

　　最后，我想用“做事勿挜死空，做人勿摆挖而司”来收尾。搿两句闲话，非但是各行各业侪应该牢记个职业操守，也是当今诚信社会人人必须坚守个道德底线！