文/邵永平

　　杨华生，迭位12岁开始演滑稽个曲艺大师、国家非物质文化遗产独脚戏项目代表性传承人，于2012年5月24日上午八点四十五分向世人谢幕，享年95岁。伊勿仅塑造了《七十二家房客》里个警察“三六九”、《苏州两公差》里个公差张超、《糊涂爷娘》里向个孙平以及《阿Q正传》里个阿Q等四大滑稽经典舞台艺术形象，还留下了深受欢迎个《宁波空城计》、《西洋镜》、《小菜场》等上百个曲艺剧目以及亲自撰写个曲艺理论书籍。相声达人郭德纲第一时间在其微博作出反应：“滑稽无声，氍毹失光……”。

　　记得上个世纪80年代杨华生第一次跟阿拉上课，题目叫《我怎样塑造“三六九”》，杨老风趣生动个闲话让我记忆犹新，开场白是迭能个：“我今朝能有为大家讲课个资格，主要因素有三个：第一，从酷爱京剧到痴迷滑稽，迭是我能出跳个条件；第二，与张樵侬、笑嘻嘻、沈一乐结盟”大公滑稽剧团“四大天王，即杨张笑沈组合。与姚慕双、周柏春个”蜜蜂滑稽剧团“交相辉映；第三，生正逢时，我成长垃拉滑稽艺术鼎盛时期，能亲眼目睹滑稽三大家：王无能、江笑笑、刘春三个勿同风格以及100多档独脚戏花样百出个段子。”如果讲让老上海人晓得杨华生三个字是垃拉天宫大戏院连演一年半个《活菩萨》（饰鲁道夫）；葛末让新上海人喜爱杨华生个，则是根据独脚戏原名改编个《七十二家房客》（饰三六九）搭电影《糊涂爷娘》（饰孙平）。“三六九”是杨华生此生最为满足和得意个角色，更重要是伊创新个“动漫形体、夸张变形、大智若愚、唱功奇特”杨氏表演风格深入人心。当年“三六九”的舞台语言：“他奶奶的，我一看就看出来，侬就勿是好人！”成为上海滩风靡一时个流行语，并成为沪上一线画家程十发、张乐平、方成等热捧个漫画“模特”。记得学馆毕业不久我垃拉当时个《上海文化艺术报》发表《寻回时代的笑声》一文，回应杨老《滑稽界要居安思危》一文。后来杨老个自传《滑稽生涯60年》一书中对我特别“给力”，两次提到我。记得垃拉我将近毕业个辰光，一日我正垃睏中觉，拨拉学馆老师叫醒，要求阿拉马上赶到电视台录播独脚戏《歌曲博士》。等到了现场再晓得是相声大师侯宝林带队到上海进行“南北交流”，台浪望过去“吓坏人”，四只沙发浪依次坐了杨华生、侯宝林、姚慕双、周柏春四个可爱个老头，叫阿拉垃拉伊拉面前班门弄斧，心里发毛。数天后我接到杨老一封亲笔短信：“看了侬个独脚戏，有创新精神，勿过朝气有余老道欠少，一个好下手要引领观众走向笑个跑道。”有一趟伊过80岁生日，我陪伊到离屋里近段个老式“混堂”汏浴，伊跟我讲：“我交关独脚戏段子侪是垃拉混堂里孵出来个，混堂与茶室有异曲同工之妙，三教九流发生事体样样听得着；也是偷学方言个场所，尤其是扬州话。伊走进混堂，一眼也呒没明星架子，用苏北话跟职工邪气热络。勿过杨老有个习惯，伊正式出客衣着交关讲究：配上一副”金丝边“，风度翩翩，气场不凡，一眼望过去，就是老派上海男人腔调。就讲伊吃大闸蟹，真个是井井有条地挼铁锈蟹，”骨肉分离“得清清爽爽。杨老最后十年是垃拉曙光医院度过个，伊乐观面对生与死，始终心系滑稽事业，伊对滑稽艺术渗透到血液里向个搿份爱，对后辈新人帮衬激励，我永生永世也勿会忘记脱个。